照顧孩子唔係想像中咁易 媽媽嘅3個主要壓力來源

十月懷胎等到BB出世後，終於體會到做爸媽嘅心情，亦深深明白到幸福同痛苦係密不可分。同孩子嘅相處雖然能夠帶畀媽媽前所未有嘅幸福感，但照顧孩子嘅工作亦會為媽媽帶嚟巨大嘅壓力。

1. 照顧小孩

做女嘅時候，總覺得做全職媽媽係一件好幸福嘅事，既唔需要外出工作賺錢，又唔需要面對學校嘅功課、測驗、考試壓力，自己想做咩就做咩，簡直係天下間最筍嘅工作！直到自己成為媽媽後，先發現照顧小朋友原來係一件咁消耗心力嘅工作，每日都忙於應付難纏嘅小朋友，同時又要爭分奪秒處理好所有家務，年終無休。媽媽每日都覺得自己休息唔夠，尤其是當小朋友身體唔舒服，媽媽嘅壓力就更大！

2. 教養小孩

當小朋友慢慢長大，有自己嘅思想，會開始違抗媽媽嘅命令，如唔肯洗臉刷牙、出街過馬路唔肯拖實媽媽⋯⋯當媽媽想好好教育小孩嘅時候，但就受到小孩嘅駁斥，令媽媽又憤怒又難過，心裡面會好懷念當初嗰個唔識講嘢乖寶寶。

3. 欠缺家人支持

媽媽喺一個家庭內要照顧著眾多家人嘅起居飲食、記著所有人嘅喜好習慣，好多時都會分身不暇。當媽媽有嘢忙緊嘅時候，而孩子有唔同嘅需要，如扭抱、肚餓等，其實媽媽都好希望有其他家人可以幫手照顧下孩子，唔好下下都等媽媽做，因為一邊做緊手頭上嘅嘢，一邊聽住孩子叫喊，媽媽心裡都會感到無限壓力。

Text: Mami Editorial

圖片授權： 兔包@Facebook