有咗BB好多嘢都唔做得 係咪真㗎？認識懷孕7個禁忌

唔少孕媽媽都會覺得有咗BB之後，生活上有好多事情都會受到限制，除咗要注意飲食外，更有一大堆懷孕禁忌要遵守。

1.懷孕頭3個月唔講得？

民間常流傳孕婦自懷孕起就會有保佑胎兒平安誕生嘅「胎神」跟喺身邊，不過「胎神」好小氣，如果喺頭3個月就公開孕事會激嬲「胎神」而會引起流產風險。

其實，胎兒喺12周內都係處於唔穩定嘅狀態，流產率高，所以「胎神」一說都係希望家人對於孕事保持低調，免得太早向親友宣告喜訊後有變故，而令大家空歡喜一場，對孕婦亦會構成壓力。

2. 孕婦唔可以搬重物？

懷孕期間拎重物會造成子宮收縮、增加腹壓，會增加孕媽媽流產嘅風險。

3.孕婦拎剪刀同針線會容易流產或生畸胎？

無事實根據，其實呢啲傳言嘅目的係約束孕婦嘅行為，避免孕婦拎到呢啲具危險性嘅物品而有機會傷害到自己同胎兒。

4. 孕婦唔可以參與紅事白事？

婚喪場合人多擁迫，容易撞倒孕婦，加上通常呢啲場合嘅逗留時間長，可能會令孕媽媽因體力唔夠而感唔舒服，但如果孕媽媽身體狀態唔錯、胎兒穩定又冇曾經出現流血，其實都可以按情況出席。

5.孕期唔可以更動床位或搬屋？

其實係為咗避免孕婦動胎氣，屋企維持原狀亦省卻孕婦要重新適應新環境，可以安心待產。

6.拍孕婦肩膀會令孕婦容易流產？

一嚟係怕嚇到孕婦，二嚟係肩膀有一個肩井穴，被按壓會造成腹部肌肉收縮，好似擒拿術同搏擊術，拍肩膀會暈眩，就係因為呢個穴位，所以拍孕婦肩膊有機會令到孕媽媽嘅子宮收縮，從而增加流產機會。

7. 孕婦唔可以浸溫泉？

有研究證實，孕媽媽喺懷孕初期身體過熱，可能會對胎兒造成傷害或造成神經管病變，所以為安全起見，建議孕媽媽喺整個孕期避免浸泡溫泉，如果真係忍唔住要浸，最好只浸到腳。

Text: Mami Editorial