知道自己有咗BB之後 大把嘢要學 準媽媽喺懷孕期應做嘅3件事

當知道自己懷有BB嘅一刻起，相信媽媽們都會萬分雀躍，急不及待見到BB，正式成為媽媽嘅一分子！不過照顧BB絕對唔係一件簡單嘅事，你有足夠嘅育兒知識嗎？不如趁住呢10個月嘅悠長孕期，好好裝備一下自己！等BB出世之後都唔會手忙腳亂！

1. 加入媽媽會

準媽媽們有冇試過喺母嬰健康院門外，畀幾個手持傳單嘅姨姨們包圍呢？通常呢啲姨姨都係各大母嬰品牌嘅員工，負責招攬準媽媽加入媽媽會，佢哋會叫準媽媽填寫一啲基本嘅懷孕資料，然後送返相應嘅BB禮品畀準媽媽。值得注意嘅係，有啲品牌會根據媽媽嘅懷孕周數送奶粉、保溫壺等；亦會定期舉辦講座，教授實用嘅育嬰知識同技巧，而參加後會送贈嘅禮品亦相當豐富，包括三角枕、媽媽袋、尿片墊等，相當實用！

2. 加入媽媽group

當自己有咗BB後，最好梗係有一班有相同處境嘅準媽媽戰友互相支持同鼓勵！由大家一齊陀住BB講懷孕注意時項、生完BB後嘅坐月食療、到BB舉辦生日等等，都有一大班媽媽齊齊分享經歷同傾心事，完全唔怕會有產後抑鬱！

3. 學習照顧初生嬰兒技巧

即將要成為媽媽，當然要事先學識點照顧好自己個BB！除咗聽講座外，媽媽都可以睇書或影片學識照顧初生BB嘅技巧，如抱BB嘅手勢、點餵母乳、點為BB沖涼、換片、掃風等等，真係有好多嘢要學呀！

Text: Mami Editorial