湊住BB做唔到其他嘢 3個方法等BB坐定定

自從BB出世後，先發現有私人時間係一件好奢侈嘅事。

而呢個私人時間可能只係講緊去個廁所、沖涼，但同樣係好奢侈。

因為要無時無刻睇實BB，初生太細個又要睇到實，到BB識行就更加唔洗講，一分一秒都唔可以行開，因為你唔知下一秒BB會玩咩，驚有意外。

對於全職媽媽黎講如果屋企只有自己一個湊BB，又要做家務，加上人總有三急嘅時候，可以點令BB乖乖地又安全咁坐定定呢？

1.放BB係洗衣機前

對於未識行嘅BB，如果想佢坐好又唔會嫌悶而喊，可以開機洗衫個時試下放BB係洗衣機前，個洗衣機轉下轉下，都可以令BB有興趣望一段時間架。

如果屋企唔係用呢種前置式洗衣機嘅，可以掛個風車係窗前，都有同樣效果架！

2.比BB玩投籃遊戲

對於已經識坐、企嘅BB，媽媽可以將廁紙筒同廚房用紙筒痴係牆或者遊戲墊圍欄上，再準備一堆色彩繽紛嘅毛毛球，示範幾次點樣將毛毛球投入筒入邊。

BB就會不停咁投毛毛球，啲毛毛球又不停係筒底跌返出黎。

BB玩悶左毛毛球，媽媽可以轉其他軟身玩具，咁又可以玩一段時間喇！

3.比BB分顏色波波

對於再大啲嘅BB，媽媽可以利用返之前講嘅毛毛球，同有分隔嘅器皿，例如製冰格、食物碟、cupcake模具等等。

媽媽可以教BB將個堆五顏六色嘅毛毛球，分返顏色咁放入唔同格內。

呢個方法又可以教小朋友分顏色、又可以訓練佢地嘅耐性。

Text：Mami Editorial

Photo : Pinterest