相逢恨晚系列 買咗先知咁好用嘅10件育兒好物

爸爸媽媽喺幼兒路上總會遇到各式各樣嘅煩惱：BB半夜哭喊求安全感、學識爬會周圍去、食嘢整到成身污糟邋遢⋯⋯慶幸喺現今社會有好多偉大嘅發明，為爸爸媽媽提供唔少便利，喺育兒路上得心應手，而家等小編同各位精選10樣非常有用嘅育兒好物！

1.BB車

就算BB幾輕都好，抱得耐都難免會感到手攰，尤其是爸爸媽媽身上已經掛滿BB出門嘅必需品，一架BB車既可以令BB舒舒服服喺入面瞓覺，爸爸媽媽亦可以將重物掛喺BB車上，成身輕鬆晒！

2.揹帶

如果只係近近哋出個門，或者要去啲多樓梯／斜路嘅地方，用揹帶揹住BB出街就最適合不過，BB又可以緊貼爸爸媽媽嘅胸膛，更有安全感。

3.換片墊

可以直接放喺BB床架上，高度啱啱好可以令爸爸媽媽喺幫BB換片或著衫嗰陣，都唔駛彎腰咁辛苦，加上挺身嘅設計同防水嘅表面，對BB嘅脊骨有良好嘅承托，亦唔怕BB會隨時大小便而整污糟床單。

4.BB餐椅

可以確保BB坐定定進食，而爸爸媽媽亦可以坐喺另一張凳度餵BB食嘢，高度啱啱好唔會令爸爸媽媽覺得攰。

5.安撫奶嘴

BB容易因為冇安全感而哭喊，當爸爸媽媽分身不睱嘅時候，安撫奶嘴可以畀BB透過吸吮而冷靜落嚟，令BB感到放鬆，容易入睡。

6.防踢包被

天氣開始凍，而BB夜晚瞓覺又經常踢開張被，爸爸媽媽都會好擔心BB會凍嚫而病，防踢包皮會將BB嘅雙腳都包喺被內，唔怕BB會再踢開被！

7.遊戲墊

BB開始學翻身嘅時候，活動力加強，已經唔可以再將BB放喺梳化上喇！係時候喺地上鋪一張有一定厚度嘅大遊戲墊，畀BB更多活動空間。

8.圍欄

當BB學識爬、甚至扶住嘢行，爸爸媽媽都會擔心一個唔留神，BB會隨意去到啲有危險嘅角落，或執嘢放入口，圍橫可以確保BB喺一個安全嘅遊戲範圍內任意活動，爸爸媽媽即唔需要無時無刻擔心BB受傷，BB亦可以隨心玩樂而唔會因為被中途打憂而唔耐煩。

9.飯兜

BB食嘢嗰陣會經常整污糟衣物，防水嘅飯兜可以好好接載住BB喺餵食途中跌落嘅食物，唔怕整污糟BB嘅靚靚衫褲，又可以輕易將飯兜清潔乾淨。

10.洗髮帽

當BB識坐之後，力氣都會變得愈嚟愈大，怕洗頭嘅BB都會掙扎得好起勁，爸爸媽媽會發覺已經唔可以順利咁橫抱BB洗頭，呢個時候可以將洗髮帽戴喺BB嘅頭上，輕易清洗BB嘅頭髮又唔怕水會流入到BB嘅眼耳口鼻！（由於BB嘅頭圍會慢慢變大，太鬆太緊都會影響隔水效果，最好買啲可以調校頭圍尺寸嘅款式。）

Text: Mami Editorial