有時小朋友扭計或者發脾氣嘅原因好簡單，細心觀察可能會搵到背後原因

扭計或者發脾氣嘅小朋友都可以令到爸媽好頭痕，如果拆解到當中嘅密碼，可能可以大大減少佢地扭計發脾氣嘅次數。其實，小朋友同大人一樣，心情跟身體同精神狀況有好大關係，唔同嘅地方係，佢地心情唔好，未識表達同控制，所以好大機會變成發脾氣。

1. 攰／眼瞓

當小朋友太攰或者眼瞓，控制情緒嘅能力都會比平時低，會好扭計，特別係病嗰時，甚至會亂發脾氣。大人都一樣，唔夠休息嘅時候會燥啲，道理其實一樣。所以，當你發現小朋友開始想扭計或者發脾氣時，可以留意下，佢需要嘅係佢扭計想要嘅嘢，定係更多嘅睡眠。

 2. 肚餓

小朋友嘅基本需要離唔開「食、玩、瞓」，除左休息，肚餓都係一個好重要嘅原素。小朋友肚餓嘅時候，除左冇晒活力，仲會心情唔好。小朋友係會玩到唔記得左肚餓呢件事㗎，有時有啲爸媽會以為佢地玩到唔識控制自己，而亂發脾氣。其實，可能一份小食加一杯水，就充夠幫小朋友補充體力，同埋回復心情。

 3. 生活環境嘅突然改變

如果發現小朋友比起之前突然多咗扭計發脾氣，而且每次都無特別原因，就要留意番小朋友嘅生活環境或者習慣有冇改變，例如：搬屋、細佬妹嘅出世、轉學校……等等。每一個小小嘅轉變，對小朋友黎講都係新鮮嘅事，都可能令佢地興奮、憂慮、擔心、或者有壓力。呢個時候，爸媽嘅耐心聆聽、了解、同支持，可以大大減少佢地因轉變而感到嘅不安。

Text: Mami Editorial