想教好小朋友，容易變成3句衝口而出唔應該講嘅說話。

教導小朋友要溫柔且堅定，相信好多爸媽都會同意。但要做到一啲都唔容易，你身邊嗰位鍾意挑戰大人底線嘅小朋友，係咪都試過激到你講一啲無意思又傷感情嘅說話呢？以下三句可能係最容量衝口而出嘅說話。

1. 「你次次都係咁」

呢句說話唔能夠令小朋友清楚知道應該點做之餘，亦抹殺左佢地付出過嘅努力。就算小朋友已經係第十次做錯，可能都有試過做得到，或者努力但做唔到嘅情況。呢句說話會令佢地覺得就算努力過，爸媽都只會認為佢地一直做得唔好。

爸媽不妨喺勞氣嘅時候，先深呼吸一下，然後慢慢講比小朋友知，今次佢地邊樣做得唔好，而且點做會更加好。

2. 「點解你咁做？」

好多時都會口快快就講左「點解……」，而喺絕大部分嘅情況，小朋友唔會答到。除非係坐低慢慢同小朋友討論，如果只係單向嚴厲咁問佢地點解嘅話，只會令佢地覺得驚同埋想逃避。

其實，直接提醒佢地，更加能夠簡單直接咁令佢地明白咩係啱、咩係錯。

3. 「我唔會再理你」

呢句說話雖然有時可以令到小朋友即刻投降，但說話帶有威脅成分，會令小朋友覺得做到爸媽嘅要求，先可以得到父母嘅愛同關懷，咁樣會令小朋友缺乏安全感。安全感對小朋友嘅發展，特別係心理健康嘅發展非常重要，爸媽就算幾嬲都好，都要盡量避免咁講呀。

其實要避免，最好嘅方法係保持心境平和，如果發覺自己唔冷靜，可以深呼吸幾下，或者去飲杯水抖一抖先。溫柔而堅定，係教導小朋友同埋保持良好親子關係最好又最有效嘅方法。

Text: Mami Editorial