【回顧生b出院後開刀傷口發炎經歷】

By Suki 綿綿媽媽 on 28 Nov 2018

住了6日5夜醫院，終於可以帶綿綿回婆婆家坐月。

4月28日開刀生綿綿，5月3日就要封拆線。一直諗住自己順產，無諗過最後特發要開刀，所以之前只預備順產後護理既資訊，完全無睇過有關開刀後怎樣護理傷口既資料。所以今次經歷令我有小小痛苦。

記得5月1日出院返屋企，諗住預備上床休息時，可能腹部傷口痛既關係，發現原來自已好似唔識瞓落床，及係床自己起身，腹部用唔到力，要屋企人扶住先得，因為係醫院張床可以自動調教高度及有手柄扶住起身，所以無留意原來咁基本既動作都做唔到，返到屋企先知有呢個問題。當時都有疑問，點解唔覺其他開刀媽媽有呢個問題，自已諗住早期傷口痛d，以為好正常。

直到5月3日到東涌醫院拆線，拆線後護士話我傷口仍然未埋口，暫時用膠布幫我貼住先，叫我2日後再返去覆診，看看情況。點知到5月7日覆診個日未埋口，未有好轉，護士話如果有血水滲出就要來睇醫生。到當日夜晚就發現流膿及滲血水，到第二日返去比護士洗傷口檢查後，就立即到樓下睇急症，因為傷口已經發炎，醫生開了一星期抗生素給我食，仲叫我暫時唔好餵人奶，及要日日返來洗傷口。後期同好多媽媽傾開，先發現原來私家醫院開刀後，醫生會即時幫媽媽用束腹帶保護傷口，及幫助平日活動借力。因為我係政府醫院，所以無呢樣準備，到我知道原來要用時，已經太遲，因為傷口已經發炎，唔可以用了。

到了5月12日晚，突然多左血滲出來，於是就返去我生綿綿既瑪嘉烈醫院睇急症，最後呢晚安排我留院。此終係度做手術，佢地都會盡力跟進及處理好我傷口的。當晚有位senior醫生幫我再係傷口局部打麻醉針，之後再將傷口擘大，將傷口入面既膿及血水盡量索走，再灌水清洗，醫生話傷口發炎，入面較多污糟嘢，之後暫時需要每日到附近醫院洗傷口及每日食2次抗生素，直到5月18日返來覆診再睇情況而定，過程對我來講覺得有d痛苦，日日都要外出洗傷口，傷口又痛，跟本無機會好好地坐月，不過無辦法，首要條件希望快d 好番，先有氣力照顧綿綿。當時留了一晚醫院，同時泵了3次奶，醫院好好，肯幫我儲起，出院可以帶走比綿綿飲，醫生仲話我之前食既抗生素原來係可以照餵人奶，之前足足浪費了5日既人奶。幸好第二日可以出院，能夠同綿綿一齊過第一次母親節！乜野痛苦及唔開心都暫時忘記晒！

連續十幾日去北大嶼山醫院洗傷口，過程真係好痛苦，洗之前都要食定止痛藥，原來傷口仲有1.5cm 深，不過血水已經無之前滲得咁多，只係未埋口。終於到 5月18日返覆診，醫生檢查完，最後結果都係日日出去洗傷口，直到埋口為止，下一次覆診日期係6月5日，希望快d好番。

不經不覺已經洗了廿幾日傷口，開始唔需要屋企人扶我起床，等到6月5日覆診，終於可以停下來，不用再日日外出洗傷口喇！情況一路好轉，無血水滲出，暫時有小小未埋晒口，醫生幫我安排貼了埋口膠布，等佢慢慢自然埋口，過3星期再返去覆診。

等到6月26日返瑪嘉烈醫院覆診，知道埋晒口，即刻安心晒。抱住綿綿時都無需再就住傷口，方便好多！不過呢段經歷真係令我怕怕，日日都要外出，為防止吹風，唯有帶帽披肩再加長袖衫，行路時傷口好痛，真係覺得好辛苦，完全無辦法好好坐月。估唔到打算順產，都不一定會順產，原來真係要有兩手準備，各位媽媽如果預備生bb，都最好係產前睇定多d產後護理既資料，真係好重要。因為如果自已未康復好，好難好好照顧到bb的。如果係政府醫院突發開刀，記得叫屋企人幫你預備束腹帶呀！