孕媽媽容易焦慮 懷孕期嘅5種複雜心情

孕媽媽懷胎十月，面對懷孕期嘅各個階段、大大小小嘅產前檢查，心情不免大起大落，情緒亦容易波動，但講到底都係為咗BB可以健康順利咁出世，點都係值得嘅。相信孕媽媽都經歷過以下5種心情！

1. 冇咩妊娠反應，BB係咪正常？

有孕媽媽懷孕初期會出現強烈嘅妊娠反應，好似噁心、嘔吐，但亦有媽媽喺懷孕階段冇咩妊娠反應，雖然冇咁辛苦，但喺未感覺到胎動之前，媽媽會諗BB喺肚入面係咪一切正常呢？

2. 好想見BB，但每次產檢都好緊張

喺BB出世之前，媽媽要等到產檢先見到BB，既想見吓BB，但每次產檢總係好緊張，尤其懷孕初期嘅唐氏綜合症篩查、20週至22週要進行嘅BB結構檢查，擔心BB係咪健康、發展係咪正常，等到醫生檢查完講聲「BB一切正常 」先安心。

3. 孕期好易攰，但可以有藉口休息

媽媽喺懷孕期間成日都覺得好攰，特別係懷孕初期，仲有後期個肚愈來愈大，媽媽就愈來愈容易攰。雖然有時提唔起精神做嘢，但媽媽逼住要休息多啲瞓多啲都係好事。

4. 成日想食嘢又驚過重

大肚婆口味轉好正常，而且成日都有肚餓感，好想食嘢！媽媽食慾大增，想食夠兩個人嘅份量，不過又要留意食量，怕孕期超重對順產或者之後減磅都難。想食甜嘢又唔可以食得太多，免得出現妊娠糖尿。

5. 個肚好重想快啲卸貨，又想BB足月

去到懷孕期尾聲，媽媽個肚又大又重，出入都好費力，呢個時候媽媽心情好矛盾，一方面好想BB快啲出世，另一方面又希望BB足月先好出世。

Text: Mami Editorial