BB成日手腳冰凍 點先知BB夠唔夠暖？

天氣愈黎愈凍，成日擔心BB著唔夠衫會凍親，摸下手仔凍唔凍先~

一般媽媽檢查BB夠唔夠暖，都會摸下手仔溫度。

原來呢個方法係唔適用於BB身上架~

因為人體嘅新陳代謝速度係隨年紀而減慢嘅，相對BB嘅新陳代謝速度好快、加上產生嘅熱量好高。

而手腳係負責散熱嘅地方，手腳愈熱、散熱速度愈快。

冬天時候，如果BB手腳太熱，大腦以為身體過熱，就會加快散熱速度，反而會無咁保暖。

手腳發涼反而係最自然嘅自身保暖方法，當身體處於寒冷環境下，會自然減少供應血液係皮膚部份，而將較多熱量留比核心器官。

BB本來熱量高，如果再著得太多，熱量就無辦法排到出去，更容易焗病。

所以當BB開始流汗嘅時候，媽媽可以放膽啲、適量咁幫BB著少件衫。

咁到底點先知BB暖唔暖？

媽媽可以摸下BB嘅背脊或者心口位置，因為呢啲部位屬於軀幹部位，代表著身體重要器官嘅溫度。

只要摸到係暖暖地、無汗就代表BB夠暖喇！

Text: Mami Editorial