帶BB打唔打流感疫苗好？媽媽最擔心嘅3件事

By rachel.lo on 28 Nov 2018

BB自一出世起，就需要接種唔同嘅疫苗注射，雖然知道疫苗可以為BB提供唔同嘅保護、避免BB感染嚴重嘅疾病，但係一見到BB打針時痛哭流涕嘅樣，媽媽個心都會同BB一樣咁痛。政府給予嘅疫苗，媽媽好似冇選擇嘅餘地，覺得既然個個BB都要打，自己個BB自然都要打；但對於一啲可以選擇打唔打嘅疫苗，如流感疫苗，媽媽內心就會掙扎，究竟打唔打好呢？打咗固然可以令BB減少染上流感嘅風險，但又會擔心以下4件事：

1. 仍然會中流感

而家嘅病毒只有愈嚟愈勁，睇新聞都會見唔少小朋友感染流感而出現嚴重併發症／死亡嘅個案，令媽媽們人心惶惶。但流感都有分好多種，而流感疫苗並唔能夠對抗所有類型嘅流感病毒，所以即使接種咗流感疫苗，仍然有機會染上流感，只係如果恰巧BB中嘅流感係疫苗所針對嘅類型，可以減低BB出現嚴重併發症嘅可能，亦會加速BB復原。

2. 疫苗過敏風險

每種疫苗都有機會出現副作用，流感疫苗嘅副作用包括接種處出現痛楚、紅腫、發燒、肌肉疼痛、疲倦等症狀，亦有可能會出現嚴重嘅過敏反應如風疹塊、口舌腫脹或呼吸困難等，雖然機率唔高，但邊個可以保證唔會發生喺自己嘅BB身上？對媽媽而言，梗係非常唔想自己嘅BB冒風險。

3.白捱一針

凡9歲以下從未接種過流感疫苗嘅兒童都需要接種兩劑疫苗，而兩劑疫苗嘅接種時間至少相隔4個星期。通常接種第一劑嘅疫苗有效率只有兩成，只有接種埋第二劑先可以大大增加疫苗嘅效用。但如果小朋友接種第一劑後出現過敏反應，醫生就會評估小朋友可唔可以完成埋下一次嘅疫苗注射，如果唔得嘅話，分分鐘令小朋友白捱一針嘅痛楚。