「咁叻自己湊返！」面對四大長老湊孫爸爸媽媽敢怒不敢言嘅4件事

By rachel.lo on 27 Nov 2018

養育仔女嘅責任，本嚟係父母嘅天職，但奈何喺香港今時今日嘅環境，男主外女主內嘅分職不再，唯有父母二人出外打工先僅僅夠交租、伙食、供書教學，照顧仔女嘅責任，只能落喺「隔代父母」嘅身上。對於願意出手幫忙嘅四大長老，當然係由衷嘅感謝，但有時兩代人湊小朋友嘅觀念、知識差異，加上老一輩面對孫輩會特別嘅寵溺⋯⋯令爸爸媽媽對四大長老嘅感情變得複雜，尤其是當四大長老做以下4件事嘅時候。

1.將人哋湊孫經當聖經

爸爸媽媽嘅育兒知識主要係嚟自於醫護人員、育兒書籍；四大長老嘅就係根據自身嘅湊仔經驗、親朋戚友意見⋯⋯知識來源本身其實並冇分對與錯，只有適合同唔適合。當小朋友有咩唔妥，爸爸媽媽好多時寧願做各種資料搜集、詢問醫生建議去搵最適合小朋友嘅改善方法；而四大長老會根據自己嘅知識同問其他人意見，將所有方法通通都試喺小朋友身上，雖然大家出發點都係想小朋友好，但爸爸媽媽就會好擔心每個小朋友體質、情況都唔同，隨便亂試其他人冇根據嘅偏方可能會令小朋友情況惡化。

2.唔願意接受仔女意見

爸爸媽媽係育兒新手，而四大長老係有實際湊仔經驗嘅老手，自然覺得自己湊BB最有一手。當爸爸媽媽想四大長老試下接受新一套嘅育兒觀，如：洗咗手先可以抱BB、奶樽要消毒先可以用、餵母乳比奶粉健康等⋯⋯四大長老都會覺得好麻煩，覺得而家啲BB駛唔駛咁矝貴，亦覺得奶粉唔比人奶差，最緊要餵到個BB肥肥白白又方便快捷就夠，令母乳媽媽覺得四大長老講極都唔明。

3.個孫受傷唔敢講

小朋友跌傷撞傷好平常，但如果撞傷頭部後果可大可小，四大長老有時睇唔實小朋友而令小朋友受傷，又擔心會畀仔女責怪，所以當見小朋友冇表面傷痕，就會當冇事發生而唔敢主動同爸爸媽媽講。但其實較細嘅BB唔識表達，有機會係腦部受創或骨裂，如果四大長老唔敢講，等爸爸媽媽之後先發現BB有異常，有機會令BB錯失最佳治療時機而追悔莫及。

4.只識同孫玩但唔識湊

四大長老年輕時可能為口奔馳而將湊仔責任交畀工人姐姐或託兒所，但當步入退休之齡，想湊孫為樂，彌補返當年自己無法湊仔女嘅遺憾，但由於缺乏實際育兒經驗，未必明白BB喺每個階段嘅成長係點，只能根據自己細個嘅經歷去湊，有時會做出令父母目瞪口呆嘅行為：BB未頸硬就豎直抱、帶BB赤腳行公園、出咗街未洗手就抱BB⋯⋯無論爸爸媽媽講幾多次都左耳入右耳出，最緊要自己開心同孫玩就算，而妄顧BB嘅安全，只覺得「邊有咁易出事吖！」。