想小朋友開心好簡單，同爸爸媽媽一齊玩，就可以令到佢地哈哈大笑一餐。

小朋友好容易滿足同開心，以下4樣既簡單又係佢地最鍾意嘅。

1. 笑容係送畀小朋友最好嘅禮物

其實小朋友只要望到爸媽對住佢地笑，就已經好開心，因為爸媽嘅笑容可以畀到安全同溫暖嘅感覺佢地。開心嘅感覺係可以感染到其他人嘅，爸媽開心，小朋友自然都會開心。對住小朋友嘅時候，不妨笑多啲呀！

2. 驚喜嘅小獎勵

當小朋友做得好嘅時候，多啲讚佢地，可以令佢地繼續做得更好，間中加啲驚喜嘅小獎勵，一個貼紙或者一份甜品都可以，只要係有驚喜嘅，小朋友都會好開心㗎！

3. 認真又專心咁聽小朋友分享嘅事

當小朋友想傾計嘅時候，咩都唔洗做，就係要放低手上所有嘢，放開腦入面所有事情，專心咁聽佢地覺得有趣或者重要嘅事。可以同爸爸媽媽傾計，表達自己想法，其實係每個小朋友都需要同埋想要嘅事。

4. 欣賞同投入小朋友嘅創作故事

小朋友好聰明，佢地係會分到大人有無認真投入咁玩㗎。所以陪小朋友玩，一定要認真同埋全情投入。爸爸媽媽欣賞佢地創作嘅故事情節，或者遊戲內容嘅創意，唔單止可以加強佢地嘅自信心，而且佢地仲會好開心。

Text: Mami Editorial