同BB相處總係充滿樂趣 同BB做呢3件事最開心

當BB脫離初生階段，開始識得認人、可以靈活控制手腳嘅時候，就係最好玩嘅時候！因為可以同親近嘅大人有更多嘅互動，媽媽又享唔享受同BB做以下3件事呢？

1. 沖涼

每晚同BB沖涼係一項非常溫馨嘅親子活動！媽媽可以同BB傾下計、玩下水、按下摩，每每會氹到BB笑到卡卡聲，有啲BB仲會不停講嘢、好似唱歌咁回應媽媽！雖然有時BB會玩到忘晒形，不停撥水整到媽媽個身都濕晒，但見到BB笑，媽媽個心都甜晒，仲邊會介意自己已經變咗落湯雞！

2. 玩遊戲

BB最鍾意玩嘅不外乎係躲貓貓、騎馬仔⋯⋯喺屋企多啲同BB玩互動遊戲，除咗令BB覺得樂趣無窮外，仲可以同BB感情大躍進，睇到BB笑晒口咁追住自己，直情覺得自己好受BB歡迎，爸爸媽媽都會心情大好！

3. 出外散步

放假同BB出街，畀BB見識到好多平時喺屋企唔會見到嘅事物，除咗令BB大開眼界、周圍探索之外，佢哋仲會做出好多出其不意嘅舉動，令爸爸媽媽都見到BB唔同嘅一面，例如去公園坐搖搖馬會開心笑、見到滑梯會驚到唔敢玩但見到其他小朋友玩又會笑到卡卡聲等等，都會製造好多難忘回憶。

有BB真好！

Text: Mami Editorial