長輩幫手湊B常講嘅5句說話？

不論係全職媽媽定在職媽媽，都總係會有啲時候需要長輩幫忙湊一湊BB。

長輩緊係樂意至極，但佢地總係有幾句名言掛係嘴邊，唔知你地有冇聽過呢？

1.BB肚餓喇
當BB一喊，長輩都會覺得係肚餓咁話：「BB肚餓喇！／要飲奶喇！／BB未飲夠啊！」

但係明明飲完奶無幾耐，其實BB可以喊係因為屙左臭臭、悶、想引人注意。

2.唔洗緊張
聽到BB喊或者見到BB有少少唔妥，可能只係刮損左小小，媽媽都會變得好緊張。

但呢個時候，長輩永遠都會係隔離表現得好淡定咁講句：「唔洗緊張~~好小事姐」。

其實你話作為媽媽點會唔緊張呢？

3.撞/跌下先識大
唔理BB係初生、識坐、識爬定識行，無論邊一個階段，BB撞親或者跌親、嚴重唔嚴重，長輩都會講一句：「無事，小朋友要撞/跌下先識大架！」。

4.我以前都係咁樣湊大邊個
當你對長輩嘅做法有所質疑嘅時候，長輩都會講句：「我以前都係咁樣湊大啊邊個邊個，佢依家咪又係牛高馬大！」。

5.咁叻你自己湊返
當你質疑長輩之後，佢地答左句:我以前都係咁樣湊大啊邊個邊個，之後你依然對佢地表現質疑，佢地就會話：「咁叻你自己湊返喇！ 」。

Text: Mami Editorial