小朋友病左又唔肯食藥 5個奇招呃到小朋友又幫到你

身體髮膚受諸父母，作為爸爸媽媽，最擔憂莫過於見到小朋友病。

小朋友唔舒服食唔安坐唔落，表達唔到只可以扭計。仲要望到小朋友辛苦時，自己又辛苦，最想就係佢地乖乖地食藥休息，快啲好番。

但往往事與願遺，當你用零食、玩具都誘騙唔到佢地食藥，媽媽又可以用咩方法拆解？

1.用飲品溝稀

可以嘗試用果汁、奶或者益力多溝稀，令藥味冇咁濃烈。
如果小朋友可以用杯，比佢自己拎住飲。再準備另一枝針筒係手，同小朋友講飲哂就唔洗食藥，飲唔哂就要食藥。

2.叫小朋友幫手試味

可以同小朋友講媽咪唔知道係咩味，再根據藥水顏色問佢係唔係某一種食物，叫佢試下味。

3.用飲品盒盛載

可以洗乾淨飲品盒，再氹小朋友係果汁黎架。
當小朋友以為有果汁飲，就會好雀躍同你飲哂佢。

4.用得意公仔嘅匙羹

用一隻印有小朋友中意嘅卡通人物匙羹，再倒藥水蓋過公仔。
同小朋友以拯救遊戲方式，要小朋友飲哂啲「魔法水」先可以救到浸親嘅公仔。

5.用醫生玩具同小朋友玩角色扮演

由家長扮演醫生，小朋友扮演病人。
透過遊戲，一步一步扮演睇醫生嘅過程，小朋友就會沉醉於角色扮演之中，不知不覺咁乖乖地食藥。

Text: Mami Editorial
Photo : Pinterest