想帶BB去旅行 諗到6件事即刻冇晒興致

成為媽媽之後嘅生活變得忙碌又充實，有時都想去返一轉旅行，畀個人散下心、叉下電！不過一諗到以下6件事，就會對旅行嘅幻想破滅晒，覺得都係老老實實留喺屋企湊BB⋯⋯

1. 冇人幫手湊BB

如果真正想去旅行放鬆一下，同老公二人世界當然係最理想！不過一諗到冇人幫手湊B、湊唔掂BB，或BB會唔習慣冇咗爸爸媽媽喺身邊⋯⋯媽媽又會覺得於心不忍，寧願辛苦啲帶埋BB去（不過就失去咗放鬆嘅原意），或者放棄去旅行。

2. 帶BB去旅行要帶好多嘢

有啲爸爸媽媽都希望帶埋BB一齊去旅行，但帶BB就等於要帶埋BB車、奶粉、水、玩具、寢具⋯⋯隨時放滿一個行李箱。就算可以喺酒店放低一堆BB物品，帶BB外出行景點、買手信都仲要隨身帶備好多BB必需品，令爸爸媽媽唔能夠暢快購物。

3. BB唔適應搭飛機

就算近近哋去台灣都要至少一個鐘機程，但對爸爸媽媽嚟講，呢一程嘅時間真係好漫長，BB瞓覺就最好不過，但若然BB瞓唔著而扭計哭喊，真係會令爸爸媽媽好頭痛！

4. BB隨時要手抱瞓覺

去旅行通常每日都會走2至3個景點，但BB每日亦都有固定嘅瞓覺時間，所以好大機會喺爸爸媽媽行緊景點嘅時候扭抱扭眼瞓，爸爸媽媽就要隨時做好心理準備，行到好攰都要手抱BB哄到瞓著覺先可以放BB落BB車。

5. 同時推BB車同行李箱唔方便

帶BB去旅行啲話，去同回程都要同時推著BB車同行李箱，如果遇到要上落樓梯嘅地方，真係會好狼狽。

6. BB可能會水土不服

BB如果喺旅途上身體不適或出現突發狀況，喺語言不通同唔熟悉當地醫療嘅情況下，爸爸媽媽好難帶BB即時求醫。

所以話，做咗人爸爸媽媽真係會有好多顧忌，帶BB去旅行都要諗清楚自己接唔接受到以上可能出現嘅情況～

Text: Mami Editorial

Photo Source： Pinterest