帶BB出街遇到嘅7件好人好事 令媽媽覺得好窩心

媽媽帶住BB出街好大陣仗，媽媽袋要帶齊BB嘅用品，仲要出動BB車或孭帶。有時帶住BB出街會遇到一啲狼狽情況，好彩遇到好心途人出手相助，為媽媽解困。以下7件好人好事媽媽有冇遇過呢？

1. 幫手開門

推住BB車好似要過五關斬六將，唔係次次都遇到自動門，要開住門再推BB車有啲難度，如果對門好重就更弊。慶幸有途人幫手開門，等媽媽可以輕鬆推住BB車過。

2. 㩒住電梯

同樣要推住BB車出入，遇著好快閂埋門嘅電梯，媽媽都嚇一跳，呢個時候會有好心人㩒住電梯門，畀媽媽同BB出入先。

3. 抬BB車

如果冇電梯或者有梯級，媽媽只能夠連BB帶車抬起，通常都有人自動出現，尤其係比較有力嘅男士，幫媽媽抬起BB車，亦有熱心嘅女士會主動同媽媽一齊抬BB車。

4. 幫手執嘢

同BB出街要帶好多BB用品，有時手忙腳亂少不免跌咗啲物品，如果媽媽抱住或孭住BB，烏低身執嘢比較困難，好多謝有人幫手執起。

5. 讓座

雖然依家巴士、港鐵都有優先座，但唔係每次都坐到，讓坐亦唔係必然，有人肯讓座畀媽媽係好值得感動。

6. 氹BB

遇著BB扭計，媽媽更加手足無措，既要安撫BB又驚佢喊得太大聲騷擾到其他人的，引起其他人嘅目光。有途人見到BB喊都會幫媽媽手氹吓佢，扮吓鬼臉，媽媽又唔使咁尷尬。

7. 餐廳安排舒服位置

有體貼嘅餐廳員工見到媽媽帶住BB，會安排媽媽一個舒服位置或大啲嘅枱，方便媽媽照顧BB同擺嘢，食餐飯都安落啲。

Text: Mami Editorial