BB乾嘔需要睇醫生嗎？ 認清8個引起乾嘔嘅原因

如果BB會作出好似想嘔嘅表情，但又嘔唔出任何嘢，或只有口水嘅話，就係乾嘔嘅表現。一般媽媽都會好緊張，亦會疑惑呢個到底係BB嘅正常表現，抑或係身體出狀況呢？其實，BB會出現乾嘔嘅情況，好多時都係同以下8個原因有關：

1.細BB嘅正常反應

喺BB 2個月大左右，出現乾嘔係一種正常現象，因為呢個時候嘅寶寶咽反射仲係發育階段，可能係BB吸入氣體刺激到咽部而出現乾嘔。隨著BB長大，呢種咽反射會逐漸消失。媽媽可以喺BB飲奶時儘量避免吸入氣體，可以預防乾嘔嘅現象。

2. 食手指

有啲BB慣常食手指，有時將手指伸得太深入而引起嘔吐反應。

3. 食物顆粒太大

如果BB喺進食時出現乾嘔，可能係因為未能咀嚼同吞嚥較粗糙嘅食物，如果媽媽喺呢個時候表現太緊張，可能會嚇嚫BB，所以應改為細啖一啲餵畀BB吃，如果BB都仲係有乾嘔後應，媽媽就需要將食物整得再幼滑啲，畀多啲時間BB適應。

4. 口水分泌旺盛

BB唾液腺分泌旺盛，但未能好好咁吞嚥，就會好容易嗆到氣管或噎倒而發生乾嘔。

5. 消化不良

當BB一餐食得太飽，容易出現消化不良，建議餵BB少食多餐，食物以清淡、易消化為主。

6. 口渴

可能係飲水量不足造成，當BB加固後，應喺餐後補充適量水分。

7. 轉新奶粉

BB未能適應新奶粉嘅成分，亦有可能會出現乾嘔情況。

8.病毒性腸胃炎

通常呢類乾嘔會伴隨著發燒、食欲不振同肚屙嘅症狀，有啲BB甚至會一飲水水或奶就嘔，大便呈現水稀狀、顏色偏黃、有酸臭味，如果有以上徵兆，媽媽應帶BB去睇醫生。

當BB發生乾嘔時，爸爸媽媽千祈唔好表現得太驚慌，因為BB喺7至8個月大嘅時候已經好識得觀察父母嘅表情，只要BB冇其他異常，乾嘔完之後可以正常玩樂，就唔需要太緊張或特別治療。

Text: Mami Editorial

Source：衛生署