媽媽愈阻止愈要做 5個家居物件常常被BB拎去玩

隨著BB長大，對身邊嘅事物愈發好奇，媽媽們有冇發現，BB對屋企內嘅某啲物件情有獨鍾，一見到就會好主動咁去玩呢？

1. 紙巾盒

BB一見到就會將紙巾盒內嘅紙巾逐張抽出嚟，然後撕爛晒，玩得不亦樂乎！通常媽媽見到嘅第一個反應都係將BB抽出嚟嘅紙巾塞入去，最後演變成BB不停抽、媽媽不停塞嘅有趣畫面；而已被BB撕成碎片嘅紙巾，媽媽只好默默清理扔咗佢，避免被BB誤食。

2. 濕紙巾

濕紙巾盒亦係BB嘅大愛，因為有得揭蓋、撕貼紙同抽濕紙巾，一次過滿足晒BB三個願望！有時BB仲會模仿媽媽平時用濕紙巾抹嘢嘅動作，拎住張濕紙巾周圍抹，非常搞笑！

3. 電話

平時見得屋企人用得多，加上電話經常轉換唔同畫面，BB都會被電話深深吸引，所以會發生同屋企人搶電話，或趁屋企人行開咗就拎電話嚟滑同撳。

4. 遙控器

BB對於有制可撳嘅玩意都會感到好興奮，尤其係計數機同遙控器，睇睇下電視都會被BB突然轉台，想喺BB手上拎返個遙控器，BB就發脾氣畀你睇！

5. 電視機

BB經常睇電視，對電視特別有熟悉感，會周不時走近電視篤下佢，甚至會拎物件敲打下佢，令爸爸媽媽冒一額冷汗，好怕BB會整爛電視機。

Text: Mami Editorial

Photo Source： Pinterest