兩種情況下BB需要補充益生菌 餵BB食益生菌前要知道嘅事

好多媽媽都會買益生菌畀BB食，希望調理好BB嘅腸胃，令BB可以屙出靚便，從而令身體健康。但又係咪個個BB都有需要補充益生菌呢？

咩係益生菌？

喺人體嘅腸道內有超過1000種菌種，呢啲菌種可以分為好菌、壞菌同埋中間菌，會因為數量嘅改變而影響腸道嘅狀況，而益生菌就係對人類有益嘅活菌，亦即係好菌，可以抑制害菌生長、調節腸道菌群生態，從而維持腸胃健康。

事實上，健康嘅BB係唔需要長期服用益生菌，因為BB嘅腸道會不斷發育，良好嘅腸道係能夠自己調節菌群嘅平衡。但當BB出現以下情況，可以適量服用益生菌：

1. 服用抗生素

廣譜抗生素唔能夠識別有害菌同有益菌，所以服用時會將所有細菌統統消滅。所以醫生通常會喺開抗生素嘅同時，都會給予益生菌配合治療，幫助腸道菌群恢復平衡。

2. 肚屙

當BB肚屙之後，都會失去大量益生菌，造成腸道菌群嘅失衡，所以補充益生菌可以令腸道重新建立腸道菌群平衡，維護腸道健康。

BB服用益生菌，需要注意嘅事項：

1.唔好空腹服用

2.沖調時用溫度不要高於 37℃嘅溫水，沖好後即時服用

3.唔好同抗生素等藥物同時服用，假如已經食咗抗生素，至少相隔 2 小時後再食益生菌

4. 畀BB進食益生菌前，最好先咨詢醫生建議

Text: Mami Editorial

Source：衛生署