女孩媽媽必知 生女嘅5個好處

生仔生女唔到我哋話事，仔女係天賜嘅禮物，只要佢健康媽媽就心滿意足。所謂男女大不同，成日講「窮養仔富養女 」，男仔同女仔嘅教養方法可以好唔同，而且生男生女各有好處，先講女仔，原來生女有咁多好處，媽媽會唔會想添番個女？

1. 可以扮靚買衫

生女最好係可以幫佢扮靚，將佢打扮到好似公仔咁可愛。女仔衫款式同配搭多，有好多選擇，仲有頭飾、袋仔等配件，媽媽有藉口幫囡囡買新衫，滿足購物慾！

2. 女仔貼心又溫柔

女仔天生比男仔嗲，一般較斯文乖巧，好黐爸爸媽媽，見到囡囡就冧晒。睇爸爸對住呢位前世情人毫無還擊之力就知道，始終女仔係特別體貼。

3. 冇湊男仔咁攰

男仔比女仔活潑好正常，破壞力亦驚人，男仔媽媽湊仔要花好多體能。相反女仔較文靜，點都比湊男仔冇咁攰（當然唔排除有精力旺盛嘅女仔⋯⋯）。

4. 繼承媽媽嘅志願

媽媽總有啲細個想做而冇做嘅嘢，例如細個想留長頭髮，媽媽話短頭髮易打理；細個想學跳芭蕾舞，媽媽話唔實際。於是媽媽會將做唔到嘅嘢寄託喺囡囡身上，幫囡囡留一頭長髮，著上好靚嘅芭蕾舞衫跳舞，填補媽媽細個嘅遺憾。

5. 了解女仔嘅發展

媽媽本身都係女仔，佢好明白女仔生理同心理嘅需要同發展，因為自己都係咁樣成長，湊起囡囡上嚟會較容易掌握，亦同囡囡有共鳴。

Text: Mami Editorial