想知BB心目中 爸爸同媽媽邊個重要啲？ BB嘅3個舉動令媽媽覺得BB愛自己多啲

BB係爸爸媽媽嘅心肝寶貝，有時難免會暗暗同另一半比較，究竟BB鍾意自己多啲定對方多啲呢？雖然心裡面永遠都冇確實嘅答案，BB都唔識得開口答你，但當BB做以下呢3個舉動，都會令媽媽暗自高興，覺得自己喺BB心目中係特別高一等嘅！

1. 只餵嘢畀媽媽食

BB對餅乾零食都情有獨鍾，一見到爸爸媽媽拎出零食，BB對眼都會發晒光咁，笑得好燦爛！當BB拎到一塊餅，但冇即刻食咗佢反而遞去媽媽個口嗰刻，媽媽心裡面都會無限感動，覺得BB真係好愛媽媽，愛到連心愛嘅餅都畀媽媽先，有第二塊餅先自己食，然後爸爸咩都冇。

2.BB第一時間向媽媽討抱

BB都會揀人嚟抱，唔熟唔中意嘅連抱嘅資格都冇！但BB總係第一時間搵媽媽討抱先，就知喺BB心目中，媽媽幾咁重要啦！只有喺媽媽忙緊或出咗去嘅時候，先搵次選嘅爸爸／其他人。雖然BB經常討抱有時會令媽媽覺得好困身，但BB咁做全都係因為媽媽給予嘅安全感大啲，所以先會依戀媽媽多啲，媽媽嘅時間許可咪滿足吓BB嘅小小欲望！

3. 一見到媽媽返嚟會笑得好開心

有咩開心得過返完一日工／出咗成日街，返到屋企見到BB笑得好爛燦咁迎接自己！就知道BB有幾期待見到自己啦！反而爸爸返到屋企只係好敷衍咁望兩眼，然後繼續低頭玩自己嘅玩具。

Text: Mami Editorial