要湊好BB先做好自己 稱職父母嘅5個特質

由做人父母嘅一刻開始，爸爸媽媽嘅責任重大，BB就好似一張白紙，亦未有判斷能力，好靠父母點樣湊點樣教佢哋。想湊好BB之前，先諗下自己係咪已經做好父母嘅角色，如果你具備以下5個特質，相信你係一個稱職嘅父母。

1. 個人行為品德好

BB嘅世界暫時只有最親近嘅人，包括爸爸媽媽，BB好快就學識模仿人，會無意中學咗父母嘅言談舉止。小朋友就好似父母嘅一面鏡，喺小朋友身上可以見到自己係點樣，有時見到BB做咗啲曳嘢，好似掟嘢、發脾氣，先諗吓自己平時係咪都咁做，父母做好榜樣先可以身教小朋友。

2. 有足夠資源畀BB

所講嘅資源包括物質、時間同環境。養BB除咗開支大需要一定嘅經濟能力外，父母仲要付出時間、心力照顧BB，提供理想嘅家庭環境畀BB成長，唔單止係居住環境，仲有父母、家人關係係咪和諧。

3. 鍾意同BB一齊

稱職嘅父母係好鍾意同BB一齊，願意花時間陪佢。如果媽媽寧願網購都唔想陪多陣BB，爸爸放工想打機都唔抱吓BB，大概可以估到佢哋有幾愛錫BB。

4. 熟悉BB脾性

每個人嘅性格都唔同，BB都唔係個個一樣，父母要尊重BB嘅性格發展，而唔係照書睇、照專家講，要湊出一式一樣嘅BB，教出倒模嘅小朋友。爸爸媽媽亦唔會去比較，話人哋個BB已經識行，自己個BB仲唔識。

5. 先考慮BB需要

做決定前會先諗到BB，再考盧自己，例如屋企要裝修，你會想留更多空間畀BB活動，自己嘅空間可以縮少啲；帶BB出街，會諗吓去嘅地方有冇育嬰室，有冇位擺BB車。

Text: Mami Editorial