家有兩個孩子就會相親相愛？ 理想同現實總係有啲出入

有咗第一個孩子之後，爸爸媽媽都會心思思追多一個，然後希望兩個小朋友可以相親相愛一齊玩，體驗美好嘅手足之情。但當第二個孩子出世之後，先發現原來小朋友之間嘅相處可以係好變幻莫測⋯⋯一時就糖黐豆，一時就水溝油，有時都會令爸爸媽媽好難捉摸呀！

1. 一齊玩

爸爸媽媽嘅體力不如小朋友，同小朋友玩起上嚟有時都會感到吃力。所以爸爸媽媽都會期望，如果有兩個小朋友嘅話，可以開開心心一齊玩。但實情係小朋友有一齊玩嘅時候，亦都會爭玩具、爭圖書、爭嘢食⋯⋯咩都爭餐飽，仲隨時會大打出手。

2. 大嘅照顧細

好多爸爸媽媽都會想生完第一個小朋友之後，隔幾年再生一個，呢個年齡差足以令大嘅孩子開始有自理能力，亦可以幫爸爸媽媽照顧同教導一下細佬妹。但畢竟大嗰個孩子都只係一個小朋友，未必有能力照顧到細佬妹之餘，隨時兩個一齊曳曳，喺屋企盡情搗蛋。

3. 愛錫細佬妹

好多爸爸媽媽一廂情願認為哥哥姐姐都會愛錫細佬妹，實情係大孩子一開始都會對細佬妹有興趣，不過當發現爸爸媽媽會偏向照顧細佬妹，就會覺得唔公平，認為爸爸媽媽被搶走而變得對細佬妹冷淡，所以爸爸媽媽喺第二個孩子出世後，都唔好冷落大孩子呀！

Text: Mami Editorial

Photo Source： Pinterest