家庭事業兩邊忙 在職媽媽嘅6個苦與樂

在職媽媽既要返工又要湊BB，放完工返屋企即刻進入湊B狀態，有在職媽媽講笑話自己好似打緊兩份工。做在職、半職定全職媽媽視乎個人同家庭需要，其實大家同樣忙，對於在職媽媽嚟講要兼顧家庭同事業，通常都有以下6個苦與樂。

1. 錯過好多BB嘅第一次

在職媽媽要返工少啲時間見到BB，有時錯過咗BB嘅日常，同埋BB嘅第一次，可能係第一次爬、第一次企、第一次行，對媽媽嚟講係有啲遺憾。所以媽媽放工返到屋企都好珍惜同BB相處嘅時間，因為BB好快又要瞓覺。

2. 出門難捨難離

媽媽每次出門返工都唔捨得同BB分開，尤其當BB見到媽媽走時，又喊又扁嘴，仲掹住媽媽件衫唔畀佢走，令媽媽更唔捨得返工，好掛住陪住BB嘅時間。

3. BB病咗唔可以陪住

媽媽始終要返工，即使BB病咗都唔可以成日請假陪住佢，媽媽見到BB病好心痛，返工嗰時又會好擔心，感覺好難受。

4. 賺多少少畀BB更好嘅生活

如果媽媽有做嘢，家庭收入無疑係多啲，唔係話咩都講物質，只係養BB開支實在唔少，家庭資金鬆動啲，自己有能力畀到BB更好嘅生活，媽媽亦覺得安心。

5. 有自己嘅事業

有咗BB之後唔代表媽媽要放棄事業，只要媽媽有能力照顧好屋企，同時繼續喺工作崗位上奮鬥，甚至做出成績，成就感會好大。要喺家庭同事業取得平衡，媽媽嘅時間管理好重要。

6. 返工紓緩湊B壓力

媽媽返工要處理各種各樣嘅工作係有壓力，但長期湊住BB都有壓力，有時返工反而可以紓緩湊BB嘅壓力，畀自己轉換環境，調整心情，返到屋企更有動力湊BB。

Text: Mami Editorial