帶孩子出街 遇到呢3類途人真係令爸爸媽怕怕！

帶小朋友出街，爸爸媽媽都會一眼關七，除咗要時刻留意住小朋友嘅各種動靜，如：有冇危險舉動或滋擾到其他人外，亦都會留意下其他途人有冇影響到其他人嘅行為，一旦遇到以下3類人士，爸爸媽媽都會立即提高警覺，帶小朋友緊急迴避！

1. 一路行一路食煙嘅人

二手煙對大人小朋友嘅危害，大家都好清楚，就算屋企內可以禁煙，但出到街都冇可能要求途人禁煙，因為呢啲係屬於個人嗜好，就算唔鍾意都要尊重其他人嘅意願。爸爸媽媽如見到有人喺附近垃圾桶位企定定食煙，都話可以帶小朋友行遠啲；但遇到啲邊行路邊食煙嘅人，好似「火車頭」咁分享啲二手煙畀後面嘅人食，成段路程都同小朋友被迫一齊呼吸住二手煙嘅話，爸爸媽媽頭頂都即刻出煙呀！我唔係歧視你吸煙，但你可唔可以尊重下其他人唔想吸二手煙嘅意願呀？

2. 不停咳又唔掩口嘅人

爸爸媽媽最怕會發生嘅事，一定係小朋友生病！當帶小朋友搭車或搭升降機時，有個人喺隔離不停咳又唔戴口罩、唔掩口，好似想將所有病菌都同其他人一齊分享咁，都咪話唔驚！最慘就係喺封閉嘅空間內，想走都走唔甩，同小朋友一齊被迫接受病菌嘅攻擊！

3. 拖拉手推車／行李箱橫衝直撞嘅人

其實拖拉手推車／行李箱嘅人本身係冇問題，問題係有啲人特別心急，會拖住架車橫衝直撞、攝嚟攝去。好哋哋一條直路都要「Z」形咁過，令其他人閃避唔切。當其他人嘅腳好似垃圾咁輾過，然後若無其事咁揚長而去，只剩下痛到叫嘅小朋友同安撫小朋友嘅家長。

希望大家都可以互相尊重，做個有素質嘅途人。

Text: Mami Editorial