屯門有學校爆發手足口病停課兩周 男童染腸病毒併發腦脊髓炎危殆

有就讀屯門保良局方王錦全小學嘅11歲男童感染腸病毒71型併發腦脊髓炎。同時，病童就讀嘅學校爆發手足口病，除病童外，8位11至12歲嘅男童自10月28日出現手足口病病徵，全部人已經求醫，無須入院，情況穩定。

男病童喺11月3日入住屯門醫院接受治療，入院前已出現發燒、咳嗽同流鼻水等病徵。入院後翌日出現抽搐同上肢無力，現時情況危殆。病童學校亦爆發手足口病，學校已經就衞生署建議，對5同6年級作停課安排。

男童一直健康良好，亦無出外旅行，但爸爸最近就有呼吸道感染病徵，情況穩定，而其他屋企人暫時未有出現其他病徵。

手足口病喺常見嘅兒童疾病，通常由腸病毒引起，例如：柯薩奇病毒及腸病毒71型。感染後，病人手掌、腳掌，以至身體其他部分如臀部及大腿會出現斑丘疹或水疱。

手足口病係透過接觸病者嘅鼻或喉嚨分泌物傳染，例如透過直接接觸病者口水或者穿破嘅水疱同糞便感染。

衞生署發言人指，手足口病高峰期一般為5至7月，而10至12月亦可能會出現較小型高峰期。現時香港手足口病仍然處於高水平。由於小朋友易受感染，爸爸媽媽要多加留意小朋友健康，而且注意小朋友嘅個人衛生。

Text：Mami Editorial

Source: 衞生署新聞公報

Photos: Shutterstock