【戒夜奶三步曲要做足 BB唔會突然間自己戒】

戒夜奶係每個BB必經嘅階段，有D遲有D早，我好好彩，及及2個月大就戒咗夜奶。

當然及及唔係突然間就自己戒，我哋係有睇準時機幫佢戒，我哋只係試咗2晚就成功喇！

幾時先適合戒夜奶？睇過育兒書建議BB體重有出世時嘅2倍而且最少有5KG就可以(只作參考)，記得一定要以健康為先，如果BB體重唔達標就唔好勉強BB戒夜奶，因為咁樣有機會唔夠營養架！除此之外，如果BB可以瞓長少少時間，大約5-6個鐘，就可以試試。

至於點樣幫BB戒夜奶？

1. 固定時間餵奶，定時定候哄BB瞓

及及由出世開始，食奶時間好準時，初初3個鐘食一次奶，之後就4個鐘食一次，所以我哋會較準時間俾奶佢食，夜晚11點到食完最後餐奶就哄佢瞓，慢慢就有個固定嘅生理時鐘

2. 瞓覺前一餐餵多少少奶

決定幫及及戒夜奶開始，瞓覺前最後嘅一餐會加多1安奶俾及及食，等佢食飽飽，唔會咁易餓醒

3. 最難做到嘅----狠心

相信媽媽們習慣半夜一聽到BB喊，就會自動波俾奶BB食，我都同你哋一樣，喺及及戒夜奶之前，半夜一喊我就即刻彈起身餵奶，不過如果決心幫BB戒夜奶嘅話，媽媽們就要狠心D，等BB喊一陣，唔好即刻餵奶，試下安撫下佢先，俾奶咀佢食/抱下佢，睇下會唔會瞓番著先。

第一晚我哋嘗試安撫及及唔成功，但最後都失敗要扭食奶。到咗第二晚， 同樣地安撫下抱下佢，再試下俾奶咀佢，竟然就咁瞓番著！從此之後就冇再扭夜奶飲喇！半夜只係會喊兩三聲，俾奶咀佢就會自動瞓番，到宜家佢已經識得自己執番個奶咀入口繼續瞓喇。

每個BB都唔同嘅，戒夜奶冇一定嘅方程式，希望小小心得分享可以幫到大家！

祝BB戒夜奶成功，媽媽們有覺好瞓！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：j_and_mama

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！