新手媽媽趕快學起來 4個埋身餵哺母乳嘅姿勢

By rachel.lo on 08 Nov 2018

埋身餵哺母乳係媽媽同BB嘅親密時光，新手媽媽想餵得舒服，不妨參考下以下幾個姿勢：

1.橫卧式

媽媽坐直靠喺椅背，身體微微向前傾，腳下可放置小凳作墊腳之用，然後用手懷抱BB，令BB側身橫臥喺自己膝上，如高度唔夠，可用枕頭提升BB嘅位置同支撐媽媽手肘到乳頭嘅高度。然後確保BB嘅耳朵、肩膀同臀部都喺一條直線上；而初生BB嘅頭部同臀部應該喺同一水平。

2.欖球式

特別適合剖腹生產嘅媽媽，因為呢個姿勢可以避免BB觸碰到傷口。媽媽坐直靠喺椅背上，身體微微向前傾，腳下可放置一張小凳作墊腳之用；然後用手托著BB頭頸之間嘅位置，而BB嘅背部躺臥喺媽媽嘅手臂內側；媽媽可用手肘夾著BB嘅臀部而雙腳停放喺媽媽嘅靠背旁，確保BB同媽媽應該係胸對胸嘅位置。如有需要，可以用枕頭提升BB位置、減輕媽媽手臂同手腕上嘅壓力。

3.側卧式

當媽媽感到疲倦，呢個姿勢可以令媽媽感到舒適。媽媽同BB互相對著側臥喺床上，可以用枕頭各自墊喺媽媽同BB嘅背部以固定位置。為幫助BB更容易吮吸到母乳，媽媽應將BB嘅臀部屈曲，耳朵、肩膀同臀部保持喺一條直線上。如果媽媽產後太疲憊或有機會受到藥物影響時下使用呢個姿勢，最好有家人喺身邊照顧或觀察，以免媽媽喺餵哺時瞓著咗而令BB有窒息危機。

4.後躺式

媽媽向後瞓喺床或梳化上，用枕頭墊住頭、頸、上背部，確保有良好嘅承托。然後將BB伏喺母親胸前，令BB依附喺媽媽身體上，呢個方法可以令BB發揮本能，主動尋找乳房同吮吸，而媽媽亦可以放鬆咁協助同鼓勵BB。如果媽媽產後太疲憊或有機會受到藥物影響時下使用呢個姿勢，最好有家人喺身邊照顧或觀察，以免媽媽喺餵哺時瞓著咗而令BB有窒息危機。