【紅斑狼瘡不容忽視荷爾蒙變化或會加速病情惡化】

By 理財公主病 on 06 Nov 2018

最近同一位護士朋友傾計，想了解佢會擔心邊類型疾病。除咗三大殺手，癌症、中風及心臟病外，原來佢最擔心嘅就係「紅斑狼瘡」。呢個病會令到患者感到強烈痛楚，以及很多不同情況發生。雖然並唔係一個不治之症，但女性卻不能忽視。

唔好比個名誤導，「紅斑狼瘡」並唔係一種皮膚病，而係一種自體免疫系統性疾病，一般較嚴重嘅就係「系統性紅斑狼瘡病」。我地嘅免疫系統係用來抵抗外來細菌及病毒嘅侵襲。若有細菌入侵我地身體，免疫系統就會自動啟動，不同種類嘅白血球同淋巴細胞就會出來對抗外來入侵細菌和病毒。而「紅斑狼瘡」就係身體有唔正常淋巴細胞反應，本來係對抗外來入侵細菌同病毒，但變左製造一啲球蛋白來攻擊身體內既組織。

其中，腎臟就係一個最易受到攻擊嘅器官，因為腎臟係由許多微絲血管組成，負責過濾身體排泄物，血液流量很高，而球蛋白就係血液內流動。如果血液帶有有害蛋白的話，腎臟就係接觸有害細胞及抗體最多嘅器官。所以係「系統性紅斑狼瘡病」內，百分之五十既病人都會患上不同程度狼瘡腎炎。

「系統性紅斑狼瘡病」男女患者比例達到1比9！而20至40歲年輕女性係發病高危群。因為女性荷爾蒙對病症有大影響，所以尤其懷孕中女性患者會因荷爾蒙變化而加速惡化情況，而收經後女性發病率及復發率均會減少。

各位媽媽可以留意以下幾點，盡可能預防「紅斑狼瘡」嘅出現。係每日出門前，謹記搽防曬霜，因為紫外線係發病因素之一。另外，應注意皮膚嘅護理及多補濕，少用含化學成分產品。飲食方面，可以多食奶製品、飲牛奶及果汁等含豐富維他命D及鈣質的食物，少食高脂多鹽的食物。仲有，每日早睡早起，唔好比自己過度疲勞，平日多做運動。呢啲生活習慣每個人都知道，但要每項都做到確實不容易。