小朋友一場小病，可以令爸媽既擔心又頭痕。

有小朋友嘅爸媽就會知道，小朋友唔舒服係一件幾煩嘅事。下面嘅苦況大家有冇遇過呀？

1. 擔心係嚴重疾病

小朋友唔舒服，發燒係令爸媽最擔心嘅，未退燒嘅時候，要幫佢地定時探熱，包括半夜。一日小朋友未退曬燒，爸媽都會擔心係感染到較嚴重嘅細菌病毒，又或者係病情差左。嗰份身心疲累，只有做過爸爸媽媽先會體會得到。

2. 心痛小朋友辛苦

小朋友病左，自然無咩活力，平時嘅笑口棗變左苦瓜乾，爸媽見到一定好心痛。小朋友咳得嚴重嘅時候，每當佢咳一吓，爸爸媽媽個心就好似抽住痛一痛咁。

3. 餵食藥唔容易

有啲小朋友唔怕食藥水，但有更多小朋友係最怕食藥。爸媽用盡辦法，好彩嘅話，成功餵藥，但如果唔成功，可以點樣？

有時小朋友靠自己抵抗力會好番，但有時嚴重到要食抗生素，爸媽就更加頭痕，因為抗生素嘅療程係一定要跟足醫生指示，按時食完全部藥水㗎。對於唔肯食藥嘅小朋友嘅爸媽，餵藥真係一件苦差呀。

4. 無覺好瞓

小朋友病左，要貼身照顧，特別係夜晚，特別黐人，因為身體唔舒服，瞓得唔好，有時會特別易醒，爸媽都會有隨時候命嘅準備。

5. 小病人好難服侍

捱夜照顧小病人已經超額消耗體力，日頭仲要應付小病人多種投訴，例如：口乾、喉嚨痛、鼻塞、流鼻水、好攰、好唔舒服等等，要好好安撫，亦要細心照顧，好多媽媽可能會即刻諗起一句說話，「結婚做公主，懷孕做皇后，產後做奴婢」。

6. 屋企嘅小病人好容易互相傳染

如果一個小病人可以令到爸媽筋疲力盡的話，兩個或以上嘅小病人應該可以話世界變左灰色一片。

無論佢地係一齊唔舒服，定係輪住病，都唯有實行全家晚上盡早休息，希望病左嘅快啲好番，其他人就加強抵抗力，快啲停止呢場同病菌打嘅仗。

Text: Mami Editorial