每天都在學習做媽媽 新手媽媽嘅4句心聲

所有媽媽都經歷過新手媽媽嘅階段，可以用一個字「累」去概括。第一次做媽媽面對好多個第一次，咩都係好新鮮，另一方面啱啱生完BB，媽媽情緒容易波動，亦遇過情緒低落嘅時候，以下係咪你嘅心聲？

1. 人生未試過咁攰

成日聽人講湊初生BB好攰，會有好多挑戰，雖然已經有心理準備，但到自己真正湊BB時先發覺比想像中攰好多倍，唔夠瞓、唔夠精神，不斷餵奶、換片，攰到企喺度都瞓得著。

2. 身邊人少啲批評多啲鼓勵就好

自從有咗BB嘅一刻開始，身邊好多人都有好多意見，點樣湊BB、食咩奶粉好⋯⋯請尊重新手媽媽，BB係佢嘅，佢比任何人更緊張BB，也請體諒新手媽媽都係學習中，唔使七嘴八舌批評佢做得好唔好，一個鼓勵就夠。

3. 好難相信自己真係做咗媽媽

即使BB實實在在喺眼前，都唔係好相信自己已經做咗媽媽，估唔到呢個就係自己同老公嘅混合體，感覺小生命好奇妙。BB嘅出現為媽媽帶來翻天覆地嘅轉變，要花啲時間適應媽媽呢個身份。

4. BB好得意唔捨得你咁快大

媽媽見到BB個心都被融化，喺媽媽眼中佢嘅BB係最可愛！見到BB一日一日咁長大，個樣慢慢冇咁BB，媽媽又好唔捨得佢大得咁快。

Text: Mami Editorial