BB周圍爬最怕撞親 有一個安全嘅活動空間好重要 選購圍欄嘅5個要點

當BB學識爬之後，活動力大增，經常會喺屋企爬嚟爬去，令爸爸媽媽非常擔心一睇漏眼，BB就會撞到尖銳地方，或拎到啲細小物件放入口。呢個時候，好多爸爸媽媽都會萌生添置一個圍欄嘅念頭，希望BB可以喺圍欄呢個安全嘅區域內玩，但買圍欄需要考慮咩因素呢？

買圍欄應考慮5個因素：

1.安全

BB咩都有機會會咬，圍欄都唔例外，加上圍欄將會喺BB長時間逗留嘅地方，所以最好選擇採用無毒性物料製成嘅圍欄，爸爸媽媽買前可以留意下產品有冇符合國際嘅安全標準同認証；而圍欄嘅高度應有0.5米高，令BB唔輕易攀爬出嚟。

2.尺寸

爸爸媽媽可根據屋企嘅可使用面積，再考慮會劃分畀BB使用嘅遊戲空間，然後按遊戲空間嘅尺寸選擇合適嘅圍欄。

3.組裝難易度

如果圍欄組裝複雜，令爸爸媽媽花時間組裝，會影響使用嘅意欲；加上如果屋企空間狹窄，無法長時間將圍欄佔據屋企某角落，需要又裝又拆嘅話，最好都係揀選一啲容易組裝嘅圍欄。

4.收納

如果屋企唔容許長時間將圍欄擺放出嚟，可以選購可摺疊嘅圍欄款式。

5.易於清潔

圍欄將會成為BB最常玩樂同啃咬嘅地方，爸爸媽媽需要經常清潔，所以應選擇用防水物料製造嘅圍欄，容易清潔同打理。

Text: Mami Editorial

Photo Source：Gmarket、Nihonikuji