一歲半前要戒奶樽 點引導BB用飲水杯？

BB由1歲起就要開始逐漸停用奶樽，最遲要喺18個月大嘅時候完全戒咗用奶樽嘅習慣。如果BB未能及時戒奶樽嘅話，有機會令BB出現牙齒咬合不正而影響外觀，爸爸媽媽千萬要注意！

逾期使用奶樽嘅後果：

1. 牙齒咬合不正

逾期用奶樽有機會影響令牙齒咬合不正，影響下頜骨發育。

2. 中耳炎

有啲BB習慣吸吮奶樽安撫自己入睡，但飲住奶瞓覺，容易令奶沿着咽鼓管流入耳道，造成中耳炎。

3.蛀牙

BB如果習慣含着奶樽邊食邊瞓，奶液中嘅糖分會覆蓋BB嘅乳齒，容易引起蛀牙。

點令BB戒去奶樽？

1. 逐漸用杯取代奶樽

喺BB 6個月大起，可以按順序使用鴨嘴杯、吸管杯、普通杯子。最初使用嘅鴨嘴杯形狀同奶嘴接近，BB會較容易接受；等BB再大啲，就可以換成吸管杯；最後就畀BB用普通飲水杯。

2. 用其他安撫物件取代奶樽

如果BB對奶樽嘅依賴度低會較容易戒去奶樽，但如果奶樽係BB必需嘅安撫物，例如喺瞓前同哭鬧時需要靠吮吸奶嘴安撫情緒，咁戒奶樽嘅時間會長啲，爸爸媽媽需要用其他嘅安撫方式或玩具嚟代替奶樽同奶嘴 。

如果BB需要飲住奶瞓覺，爸爸媽不妨將飲奶嘅時間稍微改早一啲，用洗臉刷牙或講睡前故事作為BB每晚最後一個活動，避免將睡眠同飲奶聯繫。

3.使用杯子嘅時段

爸爸媽媽應該安排BB坐喺餐椅用餐後用杯飲水，自己先示範畀BB睇點樣用杯飲水，BB一開始可能只當水杯係玩具咁玩，只要多嘗試就可以慢慢學識用杯飲水。

而用水杯代替奶樽飲奶嘅順序應該係中午、早上、晚上，先由BB冇咁依賴奶樽嘅一餐開始，逐步慢慢擴展到其餘兩餐都用水杯取代奶樽。

Text: Mami Editorial

Photo Source: Pinterest