download MamiDaily 親子日常 app
【浸會醫院生b記】

【浸會醫院生b記】

懷孕 爸媽分享
By 茯柃媽媽 on 30 Oct 2018

當屋企人知道茯柃存在後,已經決定好女皇要係私家醫院出世。醫生係62學生推薦比佢既 : 岑德強醫生。

茯柃既預產期係2017年10月3日,係2017年10月2日中午12點幾,媽媽我就見紅喇,見到呢個情況緊係沖個靚涼洗個靚頭,再落街食餐飽先慢慢入院啦XD (Ps:記得帶齊醫生信,身分證先出門口)
到咗醫院就直上B座2樓收症房由姑娘分流,再幫你辦理入院手續。

姑娘會問你好多問題,etc:BB出世餵全人奶定配方奶?做唔做聽力測試,嬰兒代謝檢查等等⋯⋯
跟住清楚明白晒就會叫你簽文件,同你量血壓,度高磅重,驗小便,陰道檢查,剃毛毛及灌腸,唔洗十分鐘我就9秒9衝去洗手間。

攪掂以上程序姑娘會比埋個走佬袋你帶你去床位,好好彩姑娘比左個窗口位我,我住6人房,基本上頭2日都係得3-4人,第3日仲淨返自己一個,獨佔左間6人房,哈哈!


換好衫後由姨姨帶到另一間房check胎心同抽血,呢到爸爸都可以陪住。

Check完就返到自己床直到夜晚岑醫生黎檢查,檢查完話一度都未開喎,睇埋聽日情況點,如果茯柃仲未有意慾出黎就要催生,因為孕期間試過兩次出血。
因為無咩野可以做,爸爸陪到我夠鐘就走喇。

點知一過左12點,我就覺得有啲不規律既m痛,因為都唔算好痛所以決定訓覺先。
到朝早7點幾岑醫生黎幫我檢查原來已經開左2度喇,之後食埋早餐姑娘就帶左我同爸爸去生產房,個陣既m痛已經開始有規律咁痛,姑娘教我坐fitball放鬆,到10點再檢查個陣仲穿埋水,之後開始黎料,痛到真係叫救命,成個人癲到係到叫唔生喇!

姑娘比左笑氣我,仲即時教爸爸幫我按摩等我無咁痛。但已經痛到不能忍受,而我又錯過左打無痛既時間,只能大大力咁聞笑氣幫自己舒緩下,個人聞笑氣聞到wingwing地飄飄下既時候,就比姑娘拎走左支笑氣同我講生得喇叫我用力,幾經辛苦到中午12點37分,茯柃出世了,重6磅6,爸爸都幫囡囡剪左臍帶!

姑娘幫我換好衫影埋第一張一家三口既相之後就推我返床,休息左8小時後先可以落床嫁。係未落得床既時間,會由姑娘推茯柃比我埋身餵哺。如果你揀全人奶,姑娘會問你拎電話號碼,只要BB喊餓佢就會打電話通知叫你去餵哺室!

到左第三日姑娘同我講茯柃小便片唔夠問我會唔會補奶粉,等我又可以訓覺好既,因為媽媽都需要好好休息先有奶!所以我都同意左,好多奶粉牌子都有得揀。我覺得奶粉隻隻都差無幾,所以揀最後左能恩。我既最後一晚好爽咁訓左8個鐘⋯⋯

到走個日姑娘比左茯柃張針卡,出院紀錄,嬰兒相簿我地,同講解下點拎出世紙,打電話到健康院約打針等等⋯如果你餵人奶,姑娘會定時打比你問下你既情況睇下有無咩幫你解答!

入院個條手帶記得唔好扔,相簿第一頁就係比你放手帶。


✨小資訊✨

探訪產婦時間:7:30-22:00   /   探訪嬰兒時間:11:00-20:00 (只可以隔住玻璃)

另外有父母親親寶寶時光:17:30-20:00 (爸爸可以抱抱BB喇)

走佬袋(順產)有咩: 產婦衛生巾2包,床墊2張,網褲2條,清潔瓶1個,女性潔膚液1支,1個有蓋膠杯,1個袋仔比你隨身攜帶放下電話同1把鎖比你鎖櫃(穩陣起見我帶定多1包衛生巾&網褲,2張床墊)

 

====================================

Text & Photos : 茯柃媽媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

 

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道