爸媽有冇試過好想保護BB，但又唔知點開口好呢？

親朋好友見到人見人愛嘅BB，有時會太過熱情，以下嘅情況，其實媽媽們可能唔係咁鍾意㗎。

1. 錫BB

小朋友抵抗力低，尤其係初生BB，真係唔可以亂錫。媽媽見到其他人隨便錫BB，除左唔鍾意，仲好擔心。外國有嬰兒懷疑被患有唇瘡或痱滋嘅成人錫錫後，染上致命腦膜炎嘅事件，而且唔止一次。為左BB健康，生痱滋或唇瘡嘅時候固然一定唔錫得BB，平時都要盡量避免錫佢地嘅嘴仔同埋面頰，亦都要多幫佢地清潔成日放入口嘅手仔呀。

2. 摸BB面珠躉

BB皮膚又嫩又滑，但都請唔好成日摸佢面珠躉啦。每次遇到鍾意一邊話BB好得意，一邊摸BB塊面嘅人，都好想避開佢地呀。

3.開住閃光燈影相

大家同半歲前嘅BB影相嘅時候，要記得唔好用閃光燈呀。因為強光或者會損害到BB眼睛嘅細胞，有機會造成對視力嘅影響㗎。

Text: Mami Editorial

Photo Source: Pinterest