BB成日食手指 手指污糟易將細菌食落肚 點幫BB戒好？

好多BB都會有食手指嘅習慣，通常爸爸媽媽都唔會阻止細嘅BB食手指，因為呢個都係令BB得到安全感、有安撫作用；但當BB識爬之後，手仔經常接觸到地板，又周圍拎嘢玩，如果掂到污糟嘢再放入口，好大機會引起腸胃炎而唔舒服，令爸爸媽媽非常擔心，希望幫BB盡快戒咗食手指嘅習慣。

BB食手指嘅好處同壞處：

好處：

1.發展智力

有更多感覺刺激可以激發BB大腦發展，所以食手指嘅BB會更聰明。

2.訓練協調能力

BB要準確將手指送入嘴內，其實需要感覺同運動系統相互協調配合，所以經常食手指可以訓練到BB嘅協調能力。

3.自我安慰

BB可以透過食手指得到安全期同滿足感，唔單止有效安撫自己，亦有利於自我意識嘅發展。

壞處：

1.傷害手指同牙齒

如果BB嘅手指長期接觸口水同被牙齒壓迫，容易出現甩皮、腫脹、感染或變形等問題，亦有機會令牙齒向着唔正確嘅方向生長，影響牙齒排列同咬合，所以應該喺BB兩歲前戒咗食手指嘅習慣。

2.增加患病風險

好奇心旺盛嘅BB經常周圍亂摸，手容易變污糟，食手指會將細菌帶到身體內，增加患胃腸炎等疾病嘅風險。

3.影響個性發展

寶寶一旦開始手指，就會上癮咁滿足於食手指嘅樂趣，對其他活動失去興趣。有調查顯示，缺少親人關愛同心靈上慰藉嘅BB較容易養成食手嘅習慣，更有機會影響BB將來嘅個性發展。

為兩歲孩子戒食手指嘅4個方法：

1.唔好強硬制止

愈強硬制止，就會令孩子愈抗拒，出現愈禁止就愈要食嘅現象。爸爸媽媽可以同孩子共同訂立一個提醒信號，當孩子出現無意識嘅食手指行為時，父母就用約定信號提醒孩子，等孩子可以喺輕鬆環境下慢慢自行改正，從中獲得滿足感。

2.轉移注意力

當孩子食手指嘅時候，爸爸媽媽就要嘗試轉移佢哋嘅注意力，例如請孩子睇下其他事物，或講故事等。

3.令孩子嘅手有嘢可做

通常孩子悶或無聊時，就會下意識食手指，所以爸爸媽媽不妨多啲陪孩子玩，令孩子嘅手有事可做，減少食手指嘅時間。

4.用其他物件取代手指

BB食手指主要係想增加安全感同滿足口腔期，所以爸爸媽媽可以將清濕嘅毛巾或安撫奶嘴等畀BB咬，用嚟替代BB嘅手指。

Text: Mami Editorial