爸媽喜訊 立法會通過侍產假增至5日 但延長至7日就遭否決

立法會三讀通過《2018年僱傭（修訂）條例草案》，將男士法定侍產假由3日增至5日。

立法會噚日以54票贊成、1票反對、4票棄權，三讀通過將男士侍產假由現時3日延長至5日。審議期間，民主派提出修訂，建議將侍產假延長至7日，可惜畀建制派反對，最後維持延長至5日。

自由黨議員張宇人反對進一步將侍產假延長至7日，佢話：「我未必喺好僱主，因為我冇能力做到，但嗰啲自己唔係僱主嘅，就指指罵罵，去僱主荷包『打荷包、做闊佬』，仲要臉上貼光。我對依啲朋友，我勸你照鏡。其實我哋每個人都喺僱主，如果你用外籍傭工，你畀咩待遇？」

而就快成為媽媽嘅新民黨新界東議員容海恩亦反對民主派修訂，佢話：「大幅增加侍產假日數，未必理會香港社會經濟發展實際情況，亦唔係健康做法。我認為有關侍產假制度任何改動，都應循序漸進。」

男士侍產假草案通過三讀後，需經行政長官簽署確認，再由政府刊憲，預計最快可以喺出年農曆新年前實施。

Text: Mami Editorial