產後坐月最佳食療 豬腳薑功效做法全公開

豬腳薑係廣東人由古流傳至今嘅坐月食療，有滋補、驅風同補血嘅功效，非常適合因產後流失太多血氣、身體虛弱嘅媽媽。不過，產後媽媽要留意，順產者食豬腳薑一定要過咗12朝、等惡露排清先可以食，如果惡露未排清就急住食，有機會令惡露不止，引起大出血危機，隨時弄巧反拙；而剖腹者需要等傷口表面康復，約一個月後先可以食，以免影響癒合。

豬腳薑功效：

豬腳薑嘅材料包括豬腳、 甜醋、生薑同雞蛋，當中豬腳含有豐富嘅膠原蛋白，當人體吸收後，可以促進皮膚細胞吸收和貯存水分，有美胸養顏、防止皮膚乾澀起皺，令皮膚顯得豐滿光澤嘅作用；甜醋可以幫助溶解出豬腳中嘅鈣質，令因懷孕而流失大量鈣質嘅媽媽可以補充返鈣；生薑有助產後婦女散瘀驅風，舒緩情緒， 更含有豐富維他命C， 增強身體抵抗力；雞蛋含豐富蛋白質，有助細胞生長。每種材料都各有功效，缺一不可，所以產後媽媽應該每樣都食啲，而唔好偏食某一種食材。

幾時開始預備好？

喺預產期前1至2個月可以開始預備，豬腳薑除咗係畀產後媽媽補身外，亦會喺媽媽產後12朝派畀親朋好友，向大家宣布同分享有新生命降臨嘅喜悅。

食譜：

需要材料：

老薑10斤、甜醋10斤、黑米醋1斤、鹽1湯匙、豬腳適量、熟蛋適量

做法：

預產期前最少一個月開始煲薑醋：

1.將老薑洗淨、抹乾、去皮，再曬乾或用白鑊炒乾。（薑皮可留返曬乾畀產後媽媽清潔用。）

2.老薑切細舊，用刀拍到有啲裂縫，令甜醋容易滲入。

3.將甜醋放入大瓦煲內，用中火煲滾後加入薑、鹽，再煲滾後熄火，待涼。

4.第二天取出甜醋再煲滾，記住一煲滾即熄火待涼，如是者每日翻煲至產後。

食用前一至兩天先做嘅步驟：

5.加入黑米醋煲滾，再喺大瓦煲取適量薑醋放喺小瓦煲內煲滾。

6.將豬腳刮毛，放入滾水中出水，再用清水洗乾淨，再放入薑醋內煲稔。

7.將熟雞蛋去殻放入薑醋內，煲滾後熄火，一日後可食用。

*切記唔可以畀水接觸到薑醋！

Text： Mami Editorial