絕世好爸有幾多 好爸爸嘅6個表現

如果另一半幫到手湊B，絕對可以減輕媽媽嘅負擔，至少媽媽可以抖下。可惜唔係個個都做到絕世好爸，爸爸好多時講就天下無敵，做就有心無力。如果另一半做齊以下6個表現，恭喜你嘅BB有一個好爸爸，你亦有一個神隊友。

1. 幫手餵奶

BB一日飲咁多餐奶，沖奶、餵奶都唔知幾多次，爸爸肯幫手沖奶兼餵奶真係值得讚，餵奶係同BB好親密嘅接觸，你眼望我眼，係好好嘅親子時間。仲有，會洗奶樽嘅爸爸再加分。

2. 肯換片

有唔少爸爸對換片有啲抗拒，怕污糟怕臭，肯為BB換片嘅爸爸好難得。其實做咗爸爸之後，慢慢對屎尿屁免疫，因為每日都接觸BB嘅大小二便。

3. 花時間陪玩

爸爸平日要返工可能好忙，但無論放工幾攰都好都會陪BB玩。而且放假總係將時間留畀老婆同BB，帶BB周圍去，探索唔同嘅新玩意。

4. 幫BB沖涼

雖然爸爸幫BB沖涼時雞手鴨腳，幫BB著衫又亂七八糟，但佢依然享受同BB沖涼，其實爸爸同BB沖涼嘅畫面係好溫馨。

5. 氹瞓覺

氹BB瞓覺都幾花心機，BB可能扭好耐先肯瞓，爸爸會出盡法寶，播啲柔和嘅音樂，又攬又搖，終於氹到BB瞓覺，爸爸好有滿足感。

6. 半夜起身湊B

有時BB半夜喊醒，想食奶或者出現唔同嘅狀況，爸爸唔會話掛住瞓，點都會起身幫手，唔係得媽媽一個孤身作戰。

Text： Mami Editorial