BB愛嘅表現 3個舉動瞬間融化媽媽嘅心

湊BB最大嘅樂趣，莫過於見到小朋友一日比一日進步，由懵懵懂懂變得學識表達自己，仲開始識得透過各種方式向媽媽表達愛意，令媽媽心花怒放！

1.笑著回應媽媽

無論媽媽做咩表情同動作，BB都會好畀面咁笑到卡卡聲，令媽媽感受到BB好支持自己同佢玩，更會覺得BB係好鍾意自己，所以見到自己都會好開心咁笑。

2.依偎媽媽

當媽媽坐低休息嘅時候，BB會自動自覺爬到媽媽身邊，再用頭仔挨喺媽媽身上，雙眼緊緊凝望住媽媽，好似向媽媽撒嬌賣萌一樣，咁可愛嘅模樣試問媽媽又可以點頂得住？梗係要好好攬返實BB嚟錫啦！

3.緊緊抱實媽媽

當BB意識到媽媽想離開嘅時候，會張開雙手緊緊抱住媽媽；當媽媽想甩開BB嗰陣，BB仲會喊出嚟，再緊抱住媽媽嘅大腿唔放，點都唔想媽媽離開自己，令媽媽哭笑不得！呢個時候媽媽都會深深感受到BB好需要自己，好難邁開腳步離開BB呀！

當媽媽遇到BB上述嘅愛的表現，真係所有母愛都會即時出晒嚟！其實媽媽嘅快樂都好簡單咋！

Text: Mami Editorial