苦中一點甜 湊B生活嘅7個小確幸

湊BB有幾辛苦？湊過就知道，尤其湊初生BB少啲精神同體力都唔得，但見到BB一日一日咁長大，由小粉糰變成小人仔，辛苦係值得嘅！喺湊B生活中唔難發現一啲小確幸，以下7個小確幸可能足夠媽媽開心成日，將壞心情扭轉。

1. BB食奶後露出甜笑

無論媽媽餵人奶定奶粉，每次BB食完奶後都一臉滿足，甚至露出幸福甜笑，仲慢慢瞓著咗。相信媽媽見到BB食飽後嘅笑容，都會覺得好滿足。

2. BB好快瞓著

氹BB瞓覺唔簡單，有時BB扭個幾兩個鐘都未瞓到，媽媽要同佢作戰到底都咪話唔攰。如果有一晚BB好快瞓著，媽媽簡直喺心底狂呼，今晚提早私人時間！

3. BB食晒媽媽煮嘅嘢

BB去到6個月就可以加固，食固體食物。媽媽會為BB預備唔同嘅糊仔、粥仔、飯仔⋯⋯等BB可以試吓唔同嘅食物，品嚐多啲味道。媽媽為BB花心機預備三餐，BB食晒媽媽煮嘅嘢，媽媽已經好開心。

4. BB遲來的便便

唔係個個BB都便便暢通，有啲BB隔幾日先有一次便便，腸胃唔好，BB心情都差啲。見到BB嗰日有便便，媽媽即時鬆口氣，唔使咁擔心喇。

5. BB檢查結果正常

媽媽帶BB去健康院做定期檢查，只要知道BB體重、身高、發展冇問題，總之一切健康正常就心滿意足。如果BB有事要做其他檢查，結果冇事就值得感恩。

6. BB用品大特價

養BB開支唔少，奶粉、尿片、濕紙巾、清潔棉、洗頭沐浴露、洗衣液⋯⋯樣樣都係錢。間中見到BB用開嘅物品大特價，媽媽又可以掃平貨，慳得幾多得幾多。

7. 湊B變相減肥

湊BB辛苦，亦係一種體力勞動嘅工作，媽媽好多時因爲湊BB而瘦咗。突然上磅，發覺自己輕咗少少，媽媽都會會心微笑，算係湊BB順便減磅。

Text: Mami Editorial