孕媽媽身體嘅秘密 原來有咗BB之後 身體會起著呢7個變化

為咗孕育一個小生命，孕媽媽嘅身體除咗喺外表上會有變化外，連內裡都會發生奇妙嘅改變，各個器官同系統都會重新協調工作同適應BB嘅存在，盡最大努力幫助BB順利發展，依家就等小編同各位媽媽一齊盤點下身體內部會有咩改變啦！

1.心血管增加供血量

為咗供應胎兒足夠嘅營養，孕媽媽懷孕後，心血管會增加 30至40% 嘅血輸出量，所以孕媽媽嘅心跳會加快，身體嘅血液循環量增加，血漿容量更會增加  40至50%，紅血球同白血球嘅數量亦會增加。呢啲變化除咗滿足胎兒發育嘅需求，亦為孕媽媽將來嘅分娩出血起到保護作用。

2.內分泌系統

孕媽媽嘅孕酮同雌性激素會持續升高，以抑制下丘腦軸，令月經停止；催乳素亦會開始增加，等到分娩結束後，母體會大量分泌催乳素促使乳腺產生母乳；體內仲有其它激素，如：改變軟組織和關節韌性的恥骨鬆弛激素等等，都會改變分泌量。

3.乳房產生母乳

孕媽媽喺生產前幾日到啱啱生完尚未大量分泌母乳嗰陣，乳房會分泌少量淺黃色嘅乳汁，亦即係初乳。初乳含有大量蛋白質，包括抗體，可以為初生BB提供高濃度嘅營養同保護。

4.免疫系統

為咗保護BB，媽媽自己嘅免疫系統必須要變弱一段時間，因為一個人嘅免疫系統有自我保護機制，會對抗外來入侵者，如細菌同病毒等。而BB對於母體嚟講亦係一個外來者，因為BB擁有一半爸爸嘅基因，所以同媽媽嘅唔一樣，令媽媽嘅免疫系統都會對抗自己嘅BB。

5.呼吸系統

孕媽媽呼出嘅氣體變多，氧氣消耗變大，每分鐘通氣量會增加到孕前嘅 1.5倍。

6.腎同泌尿系統

腎小球有過濾作用，通過過濾將有用嘅養分留低，而冇用嘅垃圾會通過尿液排走。孕媽媽嘅腎小球過濾速度會增加40至50%，腎同導尿管會變大。

7.骨骼肌肉

孕媽媽嘅肚愈嚟愈大同重，所以身體嘅部分骨骼同肌肉會作出一啲改變去適應新重量。如孕媽媽嘅脊柱、特別係腰部以下嘅部分會向後傾斜，某啲軟組織同關節嘅韌性亦會改變，令身體可以重新取得平衡。

Text: Mami Editorial