母乳可以保存幾耐？ 唔同溫度保存期大不同

母乳媽媽最關心嘅其中一個問題係：泵出嚟嘅母乳究竟可以存放幾耐呢？原來喺唔同溫度下，母乳嘅保存期都唔同！餵母乳嘅媽媽不妨記低呢啲存放母乳嘅方法同時限，咁就唔怕被BB飲到受細菌污染嘅奶喇！

當媽媽決定要將母乳擠出，應該將母乳儲存喺已消毒嘅奶樽或儲奶袋中，並喺奶樽或儲奶袋上寫低日期，方便提醒自己將更早擠出嘅母乳優先畀BB飲用。不過唔好用箱頭筆直接寫喺奶袋上面，避免油墨有機會滲入奶袋，污染母乳。

而母乳存放喺唔同溫度下嘅時間都有所不同：

• 新鮮擠出嘅母乳喺室溫(24℃以下)，可以保存8小時。

• 放喺冰種＋冰袋 (15℃以下)，可保存24小時。

• 存放喺雪櫃內冷藏格(2-4℃)，可保存5日，不過唔好將母乳放近雪櫃門，因為經常開關雪櫃會令嗰個位置嘅溫度唔穩定。

• 如放喺單門雪櫃嘅冰格，可保存2星期；雙門雪櫃嘅冰格，溫度低於攝氏-18 ℃，可放3個月。

放喺獨立冷藏櫃溫度低於攝氏-20℃的可儲存6個月。

媽媽們亦要記住新鮮擠出嘅母乳唔可以直接加入冰奶再保存喺雪櫃內；一定要先將新鮮母乳喺擠出後嘅1小時內放入雪櫃冷卻約1個鐘，先可以再加入冰奶內；而冰奶嘅分量必須多於微冷嘅奶。

解凍後嘅母乳只可以保存24小時，請喺呢段期間內飲用，唔可以再次冷凍。

BB飲剩嘅奶要丟掉，唔可以再放返入雪櫃內冷藏。

Text: Mami Editorial

Source： 衛生署