BB出牙又開始食固體食物究竟BB幾時開始需要用牙膏刷牙呢？

By rachel.lo on 16 Oct 2018

當BB開始出牙又加固嘅時候，爸爸媽媽都會疑問：係咪係時候要用牙膏為BB刷牙呢？

其實BB一開始唔需要用到牙膏，爸爸媽媽只需要用指套或1毫大小刷頭嘅軟毛牙刷沾熟水為BB清潔牙齦同牙齒即可。

當BB長大到2歲或以上又識得將水吐出嘅話，爸爸媽媽就可以開始培養小朋友自己早晚刷牙嘅習慣，亦可以喺小朋友嘅牙刷上加一粒青豆大細嘅含氟化物兒童牙膏。不過要注意嘅係，小朋友未必能夠將牙刷乾淨，所以爸爸媽媽亦需要喺小朋友刷完牙之後，再為小朋友補刷。

小孩可用大人牙膏嗎？

大人用嘅牙膏普遍含有氟化物，而氟化物主要嘅功能就係令發育中嘅牙齒更爲堅固、預防蛀牙同牙周病。但係如果孩子喺乳齒階段嘅時候用過多嘅含氟牙膏，有機會令將來生出嚟嘅恆齒出現白色斑點，亦即係「氟斑症」，加上大人用嘅牙膏通常係較刺激嘅薄荷味，有別於一般香甜水果味嘅兒童牙膏，小朋友未必接受到而抗拒刷牙，所以大人用嘅牙膏並唔適合孩童使用。