阿媽唔一定要幫手湊孫 感激婆婆嘅4件事

如果有人幫手湊BB，可以減輕媽媽嘅壓力，尤其在職媽媽要返工，有信得過嘅親人睇住BB，媽媽就更放心。四大長老肯幫手的話當然好，有婆婆幫手媽媽更開心，始終媽媽熟悉自己嘅脾性同習慣，溝通起上嚟更容易。以下感激婆婆嘅4件事，你認同嘛？

1. 人肉育兒百科全書

由懷孕開始到BB出世，媽媽嘅育兒問題天天都多。除咗上網搵資料，最快捷嘅方法就係問婆婆！「BB 成日嘔奶點算好」、「BB半夜喊係咪唔舒服」⋯⋯婆婆都係咁湊大媽媽，經驗豐富，一個電話，婆婆即時解答到媽媽嘅問題。

2. 落手落腳湊BB 

其實婆婆唔一定要幫手湊BB，佢可以選擇退休輕鬆下，或者繼續做佢鍾意嘅嘢，但佢想減輕個女嘅負擔，唔想見到佢湊BB咁辛苦。媽媽湊BB都覺得攰，何況婆婆上咗年紀，體能冇咁好，要珍惜肯幫手湊孫嘅婆婆。

3. 回到做女時

諗番起以前做女嗰陣真係好，依家返娘家都可以重拾做女嘅感覺。每次返去，婆婆都會照顧住BB，等媽媽可以休息一下，攤喺梳化好爽。唔止咁，婆婆仲會煮好多媽媽鍾意食嘅嘢，返到娘家真係好幸福。

4. 理想傾訴對象

媽媽由人妻變成人母，要適應呢個轉變之餘，湊BB又遇到唔少難題，心底裡積埋唔少委屈，婆婆絕對係一個好好嘅傾訴對象。佢了解媽媽嘅性格同狀況，而且可以用過來人嘅身份畀到意見媽媽。

Text: Mami Editorial