爸爸媽媽要小心 嬰幼兒最常見嘅4個家居意外同預防方法

湊BB之所以辛苦，除咗因為BB會經常因為各種需要而哭喊外，仲因為當BB逐漸長大，活動力愈嚟愈強，加上好奇心旺盛，會經常做啲危險舉動，如放唔同嘢入口、拉扯枱布等，真係睇少眼都會出事！以下4個係嬰幼兒常見嘅家居意外，爸爸媽媽都要時刻保持警覺，避免BB會發生呢啲意外呀！

1. 跌傷

最常見嘅嬰幼兒意外，好多時係因為BB到處攀爬、步履不穩、雜物絆倒等原因引起。跌傷輕則會令BB擦損，重則會造成骨折、甚至腦部出血等嚴重症狀。

預防方法：

爸爸媽媽應該經常清理好地上嘅玩具同雜物。
喺小孩學習走路期間，爸爸媽媽應貼身照顧。
將孩子或嬰兒放置喺高處時應該有大人看管。
保持地板乾爽。
嬰兒床欄應經常關上。
小孩坐喺小童座椅時，需要扣上安全帶。
門窗要經常上鎖，窗口應加上窗花 / 欄，以防墮樓。
切勿放置任何可以作為踏腳用嘅物品喺窗旁，如小坐椅、木箱等，以免小孩攀爬。
注意嬰兒手推車之安全，以免翻倒受傷。

急救法：

1) 保持鎮定。如有需要，立刻召援。
2) 檢查小孩/嬰兒的清醒程度。
3) 檢查小孩/嬰兒氣道是否暢通（可否哭叫、說話），呼吸是否足夠及血液循環是否正常（觀察面色、呼吸深度、呼吸速率等）。
4) 如小孩呼吸及血液循環正常，檢查有否其他受傷。
5) 如有出血情況，檢查傷口有沒有異物。如無異物，可用一些清潔敷料覆蓋傷口，並用手在傷口上加壓止血，與及把傷肢提高，減少出血。
6) 如受傷部位出現任何變形或腫脹，切勿移動傷處，立即召援。

2. 燙傷

當嬰幼兒觸碰到熱水、火或熾熱嘅煮食用具時，都有機會出現唔同程度嘅燙傷。

預防方法：

大人避免一邊拎著熱飲、熱食，一邊拖著小孩。
喺餵食小孩同嬰兒前，先檢查食物嘅溫度係咪適中。
教導小孩唔可以進入廚房內，並喺廚房出入口設置欄柵，欄柵應經常關閉。
煮食時應小心爐火，將煮食用具如鑊、煲之手柄置靠牆邊。
同小孩沖涼前一定要先試水溫。
所有燙熱嘅食物、飲品、用具如熨斗等應妥善放置，唔可以放喺枱邊，盡量避免使用枱布，以免小孩拉動而打瀉枱上物件。
火柴同打火機應放喺小孩接觸唔到嘅地方。
電源插座要有安全罩。
警惕小孩唔好玩火。

急救法：

1) 保持鎮定。如有需要立刻召援。
2) 檢查小孩/嬰兒氣道是否暢通，呼吸是否足夠及血液循環是否正常。
3) 如呼吸及血液循環正常，檢查身體被燒傷或燙傷之部份。
4) 用水沖洗被燒傷或燙傷之部位約10分鐘。但如小孩感到寒冷或顫抖，立即停止沖洗。
5) 用清潔敷料小心弄乾傷處，並以敷料遮蓋傷口，用繃帶固定。
6) 勿胡亂在傷口塗上牙膏、豉油或其他膏劑。
7) 切勿將水泡刺破。
8) 切勿除去黏在傷處的衣物。

3.窒息

誤吞異物、頸部被繩索緊繫、被厚棉被蓋過面部、俯臥姿勢睡眠時被枕頭影響呼吸同遇溺等。

預防方法：

小心選擇玩具，留意玩具有冇容易脫落嘅細小組件。
家中細小物件應放喺小孩接觸唔到嘅地方。
窗簾繩索要縛好同剪短令小孩接觸唔到。
家中繩索同膠袋應妥善貯存喺小孩接觸唔到嘅地方。
摺檯/摺椅應設有安全扣同妥為擺放，教導小孩切勿當作玩具。
教導小孩唔可以一邊玩耍，一邊咀嚼食物。
唔應該畀小孩同嬰兒喺冇成人監督下自行使用奶樽。
一歲以下小孩瞓覺時唔可以用枕頭，床上亦避免用太大太重嘅被舖，時刻檢查被舖帶冇遮蓋小孩嘅面部。
大人應避免同嬰孩同睡。
唔可以畀小孩獨自留喺裝咗水嘅浴缸或浴盤中。
有水嘅水桶應蓋好，唔可以畀小孩接近。

急救法：

1) 保持鎮定，立即將引致窒息之物件移離患者。
2) 立刻召援。
3) 如有需要，進行心肺復甦法。

4.中毒

中毒原因包括食物中毒、兒童誤服家中貯存的藥物、清潔劑同殺蟲藥等。

預防方法：

家中藥物、化學物品等應放置喺小孩接觸唔到嘅地方，最好可以放入一個可上鎖嘅櫃內。
藥物、化學物品等應存放喺原來嘅容器內，並貼有清楚嘅標籤。
唔應該同小孩講藥物是「糖」、「糖水」等，以免令小孩有錯誤印象。
選擇玩具或食具時，留意上色顏料有冇含有毒成份。

急救法：

1) 保持鎮定。立刻召援。
2) 檢查氣道是否暢通，呼吸是否足夠及血液循環是否正常。
3) 如有需要，進行心肺復甦法，但施行人工呼吸時，小心避免接觸任何毒物/化學物。
4) 如傷者昏迷但氣道暢通、呼吸及血液循環正常，把傷者置於側臥位置。
5) 收集患者服過的藥物及嘔吐物，交予救護人員。

雖然有時意外係好難避免，但爸爸媽媽都應該盡量做好預防措施，提醒主要照顧者有關上述嘅預防措施，減低寶貝仔女出現意外嘅機會，因為一時嘅疏忽可能會導致一生嘅遺憾！

Text: Mami Editorial

Source：香港消防處