小朋友最鍾意學習同埋模仿爸媽，所以身教真係好重要。

想小朋友好，除咗努力咁指導同提醒佢地，自己先要努力做個好榜樣。以下就係身教重要嘅三個原因。

1. 小朋友最會有樣學樣

小朋友最鍾意模仿別人，特別係比佢年紀大嘅對象，學得快之餘，相似度有時真係高到可以令爸媽笑到肚痛。如果爸媽平時都有好多好習慣同好行為，小朋友學唔到十成，都有兩成。但同時，壞習慣都會學埋，而且有個壞消息，就係壞嘅通常學得仲快。有無留意到最明顯嘅係，小朋友嘅說話同埋語氣好壞都好，有啲總係似曾相識咁呢？

2. 以理服人先有用

無論大小事情，有道理先可以說服對方，小朋友都一樣。用權威式嘅語氣去教導，有時等如強行要佢地妥協，小朋友跟本唔明白原因，佢地唔會服氣，下次遇到相同情況，亦無學到新嘅處理方法，咁樣唔係長遠同有效嘅教導方法。所以，想小朋友識得揀啱嘅事去做，就要佢地明白當中嘅道理，要有道理，就唔少得爸媽以身作則，好榜樣嘅示範。例如想教小朋友喺其他人幫完佢之後，或者有需要時要講「唔該」嘅話，不妨喺日常生活嘅互動中，同小朋友相處都多講「唔該」，小朋友聽得多，用得多，自然就會成為習慣。

3. 習慣成自然 

習慣就係自然就做嘅事，所以對於小朋友黎講，培養好習慣真係好重要。如果爸媽喺身教方面努力，令小朋友能夠從中學到好行為，養成到好習慣的話，教導小朋友走正確嘅路呢件事，就一定事半功倍喇。

Text: Mami Editorial