好多新手媽媽都經歷過 3件自己嚇自己嘅湊B日常事

新手媽媽湊BB有好多問號，驚唔識照顧BB，於是睇育兒書、上網搵資料、問身邊嘅長輩或者熟手媽媽，不過睇同聽係一套，自己落手落腳做又係另一套，仲不時出現好多自己嚇自己嘅事件。根據非正式統計，好多新手媽媽都發生過以下3件自己嚇自己嘅湊B日常事。

1. 以為BB冇呼吸

媽媽就算半夜唔使起身餵奶換片，都好難一覺瞓天光！因為成日擔心BB嘅安全，BB熟睡之後毫無動靜，媽媽全晚起幾次身，睇下BB有冇呼吸，甚至輕輕放隻手指喺BB人中，感受到佢嘅鼻息先安樂。

2. 以為剪指甲剪到肉

幫BB剪指甲好有挑戰性，尤其初生BB嘅指甲又細又薄又軟，一個唔小心好容易剪到肉仔。媽媽幫BB剪指甲真係一步一驚心，仲要金睛火眼，剪落去嗰下心跳加速，「咔」一聲成日以為剪到BB手指，剪完冇事簡直一額汗。

3. 以為發燒燒壞腦

BB容易患上傷風感冒，如果發燒尤其高燒唔退，媽媽都好擔心係咁燒法會唔會燒壞腦。雖然話發燒係身體免疫系統抵抗疾病嘅自然保護功能，對身體冇害，睇咗醫生都話冇事，但媽媽依然心慌慌。

Text: Mami Editorial